BSH: Kredia 400 mln Euro e nevojshme ndaj pasigurive financiare
Banka e Shqipërisë e ka shtyrë edhe për një vit marrëveshjen me Bankën Qëndrore Evropiane për huanë e likuiditeteit. Linja e kredisë prej 400 mln Euro u miratua për herë të parë në vitin 2020, pas shpërthimit të pandemisë dhe kishte si qëllim sigurimin e likuiditetit në Euro për institucionet financiare të vendit, nëpërmjet Bankës Qëndrore.
Në raste kur ka kërcënime për tregjet financiare, BQE ofron Euro kundrejt një forme të përcaktuar si kolateral. Pavarësisht se deri tani kjo marrëveshje huaje e kolateralizuar (REPO) nuk ka qenë e nevojshme të përdoret, Banka e Shqipërisë vlerëson se ky instrument rezervë mbetet mbështetës për stabilitetin monetar dhe financiar të Shqipërisë, në kuadër të pasigurive të shtuara, që vijnë nga vazhdimi i luftës së Rusisë në Ukrainë, tensionet në Lindjen e Mesme, dhe rreziqet e tyre potenciale për ekonominë globale dhe tregjet financiare.
Banka e Shqipërisë disponon sasi të konsiderueshme të instrumenteve të tilla, si pjesë e portofolit të rezervës valutore./O.S
