Marrëveshja për pensionet
Dje është nënshkruar marrëveshja për pensionet mes Shqipërisë dhe Italisë dhe për kryeministrin Edi Rama, ky është një triumf i politikës, si mjeti i vetëm për ta bërë realitet, por edhe i tij personal.
Kryeministri Edi Rama ka përcjellë një mesazh për të gjithë shqiptarët që jetojnë në Itali, pas nënshkrimit të marrëveshjes me vendin fqinj për njohjen e pensioneve. Kreu i qerverisë shprehet se kjo është një ditë e rëndësishme për familjet shqiptarë në Itali, por edhe për politikën, pasi u arrit nënshkrimi i kësaj marrëveshje shumë të rëndësishme. “Sot janë mbi 500 mijë shqiptarë që mund të buzëqeshin për fundin e një odiseje të gjatë tridhjetë e kusur vite.
Qëkur ne nisëm të flasim me qeverinë italiane të kohës për pensionet e emigrantëve shqiptarë dhjetë vjet më parë, ata kanë pritur e kanë pritur”, tha Rama në një video-mesazh. Ai ndër të tjera tha se puna nuk mbaron këtu, pasi ka ende marrëveshje të tjera për të lidhur për të siguruar çdo emirant shqiptar në emigracion që të gëzojë të drejtën e njohjes së mundit e të djersës së tij kudo qoftë. “Sot është një ditë e bukur për familjet shqiptare në Itali.
Puna e tyre e ndershme, vitet e tyre të njëpasnjëshme në punë për të ndërtuar një ekonomi familjare me mund e me djersë, kontributi i tyre në ekonominë dhe në sigurimet shoqërore të vendit të dashur fqinj, nga sot do t’u kthehen në pensionet e tyre, secilit e secilës sipas asaj që u takon. Sot është një ditë triumfi edhe për politikën si një mjet i pazëvendësueshëm për ta bërë më të mirë, më të sigurtë, më dinjitoze jetën e njerëzve të zakonshëm. Për mua është një nga ato ditë fatlume, kur ndjenja e të qenit i vlefshëm për njerëzit e këtij vendi bëhet shumë e prekshme dhe e barazon me zero të gjithë peshën e rëndë të baltës së arenës politike e mediatike.
Kjo është një nga ato ditë kur them me plot gojën, hallall sharjet, akuzat, shpifjet, llafet e pafundme që nganjëherë bëhen aq shumë sa të vjen të thuash në dreq të gjitha! Po pastaj përpjekja vazhdon e vazhdon, me durim e me këmbëngulje për të parë ditë si kjo, kur mundi dhe mosdorëzimi përpara vështirësive, pengesave, vonesave, të cilat nganjëherë kthehen deri në zvarritje jashtë vullnetit tënd, shpërblehet me buzëqeshjen e familjeve që kanë pritur atë që meritojnë”, është shprehur Rama.
Kryeministri tha se në dukje ishte e vështirë për shkak të peshës financiare, por sipas tij u realizua. “Fillimisht dukej krejt e pamundur për shkak të peshës domethënëse financiare të një marrëveshjeje të tillë. Por ja ku ia dolëm edhe kësaj, ndërkohë që këto dhjetë vjet nisëm dhe mbyllëm me sukses negociatat për marrëveshjet e pensioneve me plot 16 shtete, që nga Gjermania deri në Kanada, ndërkohë që të gjitha qeveritë e mëparshme të mbledhura bashkë kishin mbyllur vetëm një të tillë në thuajse çerek shekulli, atë me Turqinë dhe edhe atë e ka negociuar e mbyllur një tjetër qeveri socialiste para thuajse njëzetë vjetësh”, shkruan Rama.
Shefi i Qeverisë ka falenderuar senatorin Italian Tommaso Nannicini, i cili u angazhua personalisht për ta mbajtur gjallë në labirinthet e pafundme të burokracisë italiane, procesin tejet të vështirë të negociatave të tejzgjatura. Po ashtu një falenderim ka edhe për ish-ministrin italian të Punëve të Jashtme. “Sot jam shumë krenar për bilancin tërësor të përpjekjes së qeverisjes socialiste në mbështetje të emigrantëve shqiptarëve, të cilët falë kësaj përpjekjeje gëzojnë të drejtën e njohjes së mundit e të djersës së tyre në 16 shtete, ku si pensionistë do të shpërblehen me meritë bazuar në sigurimet shoqërore që kanë derdhur nga puna e tyre e palodhur.
Natyrisht kjo përpjekje nuk mbaron këtu, sepse ka ende marrëveshje të tjera për të lidhur deri kur punëtori i fundit shqiptar në emigracion të gëzojë të drejtën e njohjes së mundit e të djersës së tij kudo qoftë ku ka derdhur sigurime shoqërore nga puna në një vend tjetër. Por sot është dita për ta mbyllur me një urim për të gjithë shqiptarët që punojnë në Itali”, shkruan Rama.
