Ambasada amerikane në Tiranë ka reaguar për vizitën e Sekretarit Amerikan të Shtetit, Antony Blinken në Tiranë.
Ambasada njofton se Blinken do të takohet me Presidentin Begaj, kryeministrin Rama dhe do të marrë pjesë në një aktivitet të veçantë rinor te Piramida e Tiranës, për të festuar të ardhmen e marrëdhënieve SHBA-Shqipëri.
Sipas ambasadës, Blinken do të takohet me drejtues të sistemit të drejtësisë dhe komunitetin e ambasadës. Kështu ambasada ka konfirmuar lajmin e takimit mes Blinken dhe kreut të SPAK, Altin Dumani.
“Mirë se vjen në Shqipëri, Sekretari Blinken! Gjatë vizitës së tij të parë në Shqipëri, Sekretari i Shtetit i SHBA, Antony Blinken do të takohet me Presidentin Bajram Begaj, Kryeministrin Edi Rama dhe do të marrë pjesë në një aktivitet të veçantë rinor te Piramida e Tiranës, për të festuar të ardhmen e marrëdhënieve SHBA-Shqipëri. Ai do të takohet gjithashtu me drejtues të sistemit të drejtësisë dhe komunitetin e ambasadës. Na ndiqni përgjatë kësaj vizite historike”, thuhet në reagim.
Paraditen e sotme, Sekretari Amerikan i Shtetit, Antony Blinken mbërrit në tokën shqiptare. Ky moment është historik për Shqipërinë. Blinken është Sekretari i gjashtë që viziton Shqipërinë në 33 vite demokraci.
Agjenda e Blinken-it
Në orën 13:35 Blinken do zhvillojë një takim dhe do përshëndesë punonjësit e ambasadës amerikane në Tiranë dhe anëtarët e familjes në Tiranë, Shqipëri.
Në orën 14:15 Blinken do të takohet me afganët që kanë aplikuar për vizë.
Në orën 15:05 Blinken do të takohet me Presidentin Bajram Begaj në Shqipëri.
Në orën 15:35 pasdite Sekretari Blinken do të mbajë fjalime në një aktivitet të të rinjve dhe të diplomuarve me temë “Festojmë të ardhmen e marrëdhënieve SHBA-Shqipëri” në Tiranë, Shqipëri.
Ora 16:15 Blinken do takohet me kryeministrin Edi Rama.
Ora 17:55 Sekretari Blinken do të marrë pjesë në një ceremoni nënshkrimi për një Memorandum Mirëkuptimi mbi Shkëmbimin Akademik Fulbright dhe një Memorandum Mirëkuptimi mbi Kuadrin Kundër Manipulimit Informativ të Shtetit të Huaj në Tiranë, Shqipëri.
Kjo ngjarje do të transmetohet drejtpërdrejt në faqen kryesore të Departamentit dhe kanalin “YouTube”.
Ora 18:10 Blinken dhe kryeministri Edi Rama do të mbajnë një konferencë të përbashkët shtypi në Tiranë, Shqipëri./ S.M
