Policia e Tiranës ka arrestuar katër të shoqëruarit e djeshëm për vrasjen e 18-vjeçarit Aureljo Dervishi mbrëmjen e të dielës në Shkozë. Në pranga janë vënë 20-vjeçari Fensis Shehu, si dhe tre të miturit, dy nga 16 vjeç dhe njëri 15-vjeç.
Ata janë “zbërthyer” para grupit hetimor, ku kanë zbardhur dinamikën e krimit. 15-vjeçari ka pranuar se ka qenë ai i cili e ka goditur me thikë në gjoks Aureljo Dervishin, pas përleshjes fizike mes tyre.
Shkak i sherrit ka qenë një e mitur, e cila ka qenë në automjetin tip “Audi” bashkë me viktimën, dy shokët e viktimës dhe një vajzë tjetër. E mitura ka deklaruar para grupit hetimor se ka qenë në një lidhje romantike me 20-vjeçarin Frensis Shehun, shokun e autorit.
Ky i fundit, teksa ka qenë duke udhëtuar bashkë me tre të miturit me automjetin tip “Volkswagen Tiguan”, ngjyrë gri, ka hasur pranë rrethit të Shkozës automjetin “Audi”, brenda së cilës ka vënë re se ndodhej dhe e dashura e tij 16-vjeçare.
E mitura ka deklaruar para grupit hetimor se autorët u kanë bërë me shenjë nga xhami. Në këtë moment, dy grupet e të rinjëve kanë zbritur nga automjetet e tyre dhe ka filluar përleshja fizike. E mitura ka deklaruar se në makinë me viktimën ishte për shkak të miqësisë që kishin dhe se e kishte në afërsi të lagjes.
Ndërkohë, dy 16-vjetaçët e tjerë kanë pranuar se kanë dhunuar grupin tjetër, por sipas tyre nuk kanë përdorur thikë. Të njëjtin qëndrim ka mbajtur edhe 20-vjeçari Frensis Shehu.
Sipas të gjithë dëshmive të marra, burime bëjnë me dije se asnjë prej tyre nuk ka pranuar se kanë pasur konflikti të mëparshme.
Kujtojmë se 18-vjeçari Aureljo Dervishi, mbeti i plagosur pasi u godit me thikë në gjoks. Ai është tentuar të dërgohet me urgjencë për ndihmë mjekësore, por nuk ka arritur dot t’i mbijetojë plagës së marrë dhe ka ndërruar jetë rrugës për në spital.
Pas krimit të rëndë, autorët me automjet tip “Tiguan” dyshohet se u larguan drejt Unazës Lindore, por u kapën ditën e djeshme në Farkë./O.S
