Rritja e çmimit të energjisë elektrike për furrat mund të reflektohet në rritjen e çmimit të bukës. Sipas ekspertit Pano Soko, rritjes prej rreth 25% të çmimit të bukës që prej vitit 2022, do t’i shtohet një tjetër rritje prej afërsisht 5%.
“Shihet një rritje e çmimit të energjisë për një pjesë të mirë të furrave të bukës. Energjia është kostoja kryesore që kanë të gjitha bizneset. Një lëvizje në fashën e energjisë do të reflektohet në çmimin e bukës. Nga të gjitha të dhënat del se vendi ynë nuk e ka problem emergjent çështjen e energjisë. Me problemin vendas, ne mbulojmë konsumin. Vetëm nga kriza, që nga viti 2022, çmimi i bukës është rritur me 25%.
Kur energjia rritet me 10%, buka rritet me 5%. Energjia është kostoja kryesore e furrave. Kjo amplifikohet edhe për faktin se është kostot e tjera nuk po mbeten në vend. Kjo mund të sjellë një rritje të çmimit të bukës.
Rritjet e propozuara janë 9.5-12 lekë. Duke qenë se një pjesë e madhe e furrave kanë edhe shërbime të tjera, atëherë pritet një rritje 1.8 lekë për kilovat, që mund të kemi rritje deri në 5% të çmimit të bukës, praktikisht jo më shumë se 10 lekë. Pra një bukë masive 600 gramëshe që kemi shot mund të shkojë rreth 125-130 lekë.”, tha Soko./e.t
