Tema e të fjeturit me qenushin ose macen i bën gjithmonë njerëzit të ndahen në dy grupe dhe e vërteta është se nuk ka një përgjigje të saktë apo të gabuar për të.
Ne mund t’ju listojmë gjithë arsyet pse do të të bënte mirë të flije me qenushin tënd, po ashtu edhe disa arsye pse ata që nuk flenë nuk po bëjnë gabim, ndaj zgjedhja është e jotja.
Ndër faktet më të rëndësishme për të fjeturit me kafshë është çlirimi i stresit dhe ankthit. Zgjimi dhe gjumi për ata që flenë pranë mikut të tyre me katër putra është më i mirë se për njerëzit që nuk kanë një kafshë shtëpiake.
Për shumë të tjerë, kafshët shtëpiake kthehen në mbështetje emocionale pas periudhave të këqija. Qenushët ndihmojnë shumë edhe me makthet, pasi një pjesë e tyre kanë aftësinë të reagojnë kur ndjejnë se i zoti është në siklet. Për më tepër, katërputroshët e luftojnë ndjenjën e vetmisë dhe janë një shoqëri mjaft e mirë.
Nga ana tjetër, për shumë persona, të fjeturit me kafshët e shtëpisë mund të prishë gjumin dhe t’u shkaktojë ndjesi këputjeje. Gjithashtu, temperatura e trupit të kafshëve është më lartë dhe mund të shkaktojë ndjesinë e vapës, duke krijuar parehati.
Nëse vendos që ta zbatosh rutinën e të fjeturit me kafshët shtëpiake, sigurohu të kesh një rutinë shumë strikte higjiene. Ndërro çarçafët shpesh, shëtite qenin para se të flesh që të jetë mjaftueshëm i lodhur sa për të fjetur rehat dhe pastroje aq sa mundesh, duke gjetur ekuilibrin mes higjienës dhe mbrojtjes së lëkurës së qenushit./E.Ç
