Besnik Berisha, avokati i Noizy-t (Rigels Rajkut), ka folur në një intervistë virtuale për “Kosova Today”, mbi arrestimin e reperit dhe gjendjen emocionale të tij brenda ambienteve të paraburgimit.
“Çështja është bartur në gjykatën e Durrësit. Besoj do të kemi një verdikt brenda javës. Nuk ka tendenca as nga Noizy e as nga unë që ta pengojmë procesin e nisur në Kosovë, madje po përpiqemi që të ndriçojmë gjithçka që ka ndodhur atë natë”, u shpreh ai, duke shtuar se pritet të dëgjohet çështja nga një gjyqtar.
Ai tha gjithashtu se Noizy do të paraqitej në datën e vendosur nga autoritetet, por më pas, gjërat u përkeqësuan. Më tej, vijoi:
“Nuk ka qëllim sepse nuk ka gisht as në lëndim e kjo do të provohet që është vetëm një lëndim i lehtë trupor ndaj së paku një personi. Ka dëshmitarë me të cilët kam kontaktuar dhe kam mësuar për rrethanat e rastit dhe deri më tani, jam i lumtur të kumtoj se nuk ka lëndim të rëndë të viktimës. Nuk bëhet fjalë për diçka të rëndë”.
Sa i përket gjendjes emocionale të reperit, Berisha tha:
“Paraburgimi nuk është shtëpi pushimi. Është çështje ku i nënshtrohet një rregulli shtëpiak çdo i paraburgosur. Noizy është mirë, jo për faktin se ndihet mirë atje ku është, por për faktin që ndihet mirë për atë që nuk ka bërë dhe ndihet mirë që është i pastër nga akuzat që i ngarkohen. Por, shpresoj dhe besoj se gjykata në Shqipëri ka arsye të mjaftueshme dhe të bollshme për personalitetin, karakterin, lidhjen e tij me vendin, profesionin, emrin e reputacionin që të marrë një vendim që do duhet ta linte Noizy-n në liri në pritje të vendimeve të tjera që do merren.”
Rikujtojmë se Noizy u arrestua në Kune të Shëngjinit, ku po shkonte për të performuar në një klub nate. Ai ishte shpallur në kërkim nga policia e Kosovës, për shkak të një sherri të ndodhur në Pejë, ku është dhunuar një tiktoker. Së bashku me Noizy-n është arrestuar edhe DJ Crax (Bahtjar Bajraktari)./E.Ç
