Nga Mero Baze
Pasi Frangaj mbaroi punë me familjen Hysa, Berisha e ndryshoi ligjin tani në favor të pronarëve që ishte dhëndri i tij.
Në dosjen e SPAK për Sali Berishën ka disa detaje që tregojnë se si Berisha përdorte ndryshimet ligjore duke krijuar standarde të ndryshme për pronarët që kërkonin pronat dhe po ashtu standarde të ndryshme për privatizimin e tyre me lekë apo bono privatizimi.
Dy janë rastet më tipike, ku vetë Sali Berisha është angazhuar personalisht duke folur dhe në dy mbledhje qeverie për ndryshime ligjore në favor të Jamarbërit, një herë për të privatizuar klubin dhe më pas për ta blerë atë me letra me vlerë që praktikisht ishin 6 deri 10 për qind e vlerës reale.
Rasti i parë është ndryshimi i ligjit për sportet dy herë radhazi. Herën e parë për të penguar familjen Hysa të merrte Kinostudion si pronare se i duhej Frangajt dhe pas disa muajsh për të penguar klubin “Partizani” të mbante Klubin se i duhej Jamarbërit.
Ligji i sporteve ka ndryshuar papritur në tetor 2007, ku neni 31 ndryshohet duke theksuar se “objektet sportive jepen me koncesion me kusht që të mos e ndryshojnë destinacionin” në përputhje me ligjin nr. 9663 të datës 18 dhjetor 2006, “për koncesionet…”. Nga ana tjetër ky ligj në nenin 4, “Fusha e zbatimit të koncesioneve”, përcakton si fusha të zbatimi dhe sportin kulturën arsimin…. etj.
Pra ky ndryshim ligjor i vitit 2007, u jepte përparësi qiramarrësve të institucioneve kulturore apo sportive dhe ndalonte privatizimin e tyre nga pronarët. Dhe këtu fitoi Frangaj kundër familjes Hysa.
Ky ndryshim ligjor i ndalonte ata të merrnin pronën e tyre dhe i hapte rrugë Frangajt të mbante kontratën me Kinostudion.
Pasi Frangaj mbaroi punë me familjen Hysa, Berisha e ndryshoi ligjin tani në favor të pronarëve që ishte dhëndri i tij.
Kështu në Qershor të vitit 2008, Pango përsëri propozoi që neni 31 të ndryshonte dhe tani të shtohej se kur kishte pretendime pronarësh ata mund ta privatizonin dhe ta ndryshonin destinacionin, siç i interesonte familjes Berisha.
Ky është dhe ai momenti kur Berisha është vetë aktiv ne mbledhje dhe i del zoti ndryshimit.
Pra që ta kuptojmë më qartë, brenda një viti, qeveria ndryshon një nen të ligjit sipas hallit të njerëzve të saj.
I duhej të mos ja jepte kinostudion familjes Hysa e ndaloi me ligj derisa sa mbaroi punë Frangaj me privatizimin. Pastaj e ndryshoi prap derisa mbaroi punë familja Begeja me klubin “Partizani”.
Rasti i dytë flagrant është ligji i letrave me vlerë.
Në dhjetor të vitit 2008 në një mbledhje qeveria, vetë Sali Berisha përsëri aktiv personalisht, ka mbrojtur privatizimin e objekteve me 80 për qind letra me vlerë dhe 20 për qind me lekë.
Gjatë gjithë mbledhjes së qeverisë Sali Berisha ka qenë mbrojtësi i flaktë i këtij ndryshimi, ka nxitur Ritvan Boden ta shpallë atë si sukses të qeverisë ndaj pronarëve dhe ka falënderuar Rulin për “iniciativën”.
Kështu, familja Begeja dhe ortakët e paguajnë Klubin “Partizani” me bono privatizimi në shumën afërisht 100 milion lekë të vjetra, që po ta llogarisësh se bonot i blinin me 6 deri 10 për qind i bie ta kenë blerë gjithë klubin Partizani me rreth 800 mijë lekë.
Por i njëjti kryeministër, i cili e shpalli atë ndryshim qeverie në favor të vajzës si sukses të madh të qeverisë së tij, disa muaj më vonë, më 1 Korrik 2009, kur akoma nuk e dinte a do të ishte më kryeministër, e ndryshoi prape ligjin me VKM 738 datë 1 korrik 2009 duke I hequr bonot e privatizimit nga blerja e objekteve privatizoheshin, duke theksuar se 30 ditë pas vendimit blerësi duhet ta blinte objektin vetëm me lekë në dorë.
Pra pasi mbari punë Jamarbëri, të tjerët nuk mund t’i blinin më me bono privatizimi.
Do të mjaftonin këto dy raste, kur VKM ndryshohen sipas halleve të personave të lidhur me Sali Berishën dhe kur në të dyja rastet Berisha është vet aktiv në favor të familjes së vet, që ai të konsiderohet si I akuzuar për korrupsion aktiv, pasi ka udhëhequr me vetëdije ndryshime ligjore në favor të vajzës së tij dhe ka diskriminuar shtetasit e tjerë të Republikës në raport me vajzën e tij apo njerëzit e afërt me të politikisht.
Asnjëherë nuk ka qenë pro pronarëve se po të ishte nuk do t’ia jepte Kinostudion Frangajt para Familjes Hysa të cilës i ishte njohur. Ishte vetëm me vajzën e tij në rastin e klubit “Partizani”.
Asnjëherë nuk ishte me pronarët për ti favorizuar me bono privatizimi. Ishte vetëm me vajzën e tij për disa muaj sa mbaroi punë dhe e riktheu përsëri me lek në dorë.
Është thjeshtë një kryeministër që e ka kthyer shtetin në argatë të familjes së tij, e cila tani hallin më të madh ka si të justifikoj vilat nga Hungaria deri në Bruksel gjermani e Holandë dhe si mbi të gjitha si të na mbushi mendjen të gjithëve, se ato i meritojnë./ S.M
