Premtimet e qeverisë për pensionistët për bonusin e këtij fundviti nuk janë pritur mirë nga një grupim pensionistësh të cilët kanë dalë në protestë këtë të mërkurë para godinës së Kryministrisë.
Të indinjuar nga sjellja e qeverisë, ata kërkojnë llogari për këtë trajtim që po iu bëhet, teksa njëri prej tyre nuk ngurroi ti akuzojë ata hapur.
“Mua më ka dalë pensioni 171 mijë lekë të vjetra. Edhe 500 mijë lekë i kam të pamjaftueshme me këto çmime, kanë shkuar në stratosferë. Kryeministri llogarit shportën. Vetë fjala shportë është fyese si nocion. Ne nuk jemi derra, pse duhet të na bëjnë me shportë. Përderisa i thua rinisë të derdhë kontribute për pensionet, është të tallesh. Bën autogol me këtë”, reagoi pensionisti i revoltuar.
Sa i përket bonusit të premtuar nga qeveria për pensionistët, ai e cilësoi këtë si mashtrim të madh dhe fyerje për statusin e tyre.
“Bonusi është një mashtrim i madh. Është një turp dhe djallëzi. Si u formulua? Bonusi përbëhet nga bonusi i përcaktuar në buxhetin e kaluar dhe 24 milionë euro nga indeksimi. Indeksimin që nuk na e dha në tetor e bashkoi me bonusin në ligj dhe mashtron. Gënjen ata delet e partisë, mua më duhet sa fus në xhep”, u shpreh pensionisti.
