Presidenti rus Vladimir Putin ka deklaruar se Rusia duhet të kishte nisur pushtimin e plotë të Ukrainës më herët dhe të ishte më e përgatitur për luftën.
Në konferencën e tij për shtyp të fundvitit, Putin tha se vendi i tij duhet të kishte pasur “përgatitje sistematike” për pushtimin e vitit 2022, të cilit ai i referohet si një “operacion ushtarak special”, shkruan BBC.
Rusia pushtoi Krimenë nga Ukraina në vitin 2014 dhe forcat pro-ruse filluan një konflikt në Ukrainën lindore, por tetë vjet më vonë Putin u përpoq të pushtonte Kievin.
Gjatë konferencës që zgjati katër orë, Putini foli gjithashtu për liderin e rrëzuar të Sirisë, doktrinën bërthamore më agresive të Rusisë si dhe çështjet e brendshme, si çmimi i gjalpit.
Gjatë konferencës Putini u shfaq përpara një ekrani të madh blu me hartën e Rusisë që kishte të implementuar edhe pjesët e aneksuara të Ukrainës.
Në lidhje me presidentin e sapozgjedhur të SHBA-së, Donald Trump, Putini tha se dyshja nuk kishin folur për katër vjet, por se është gati ta takojë atë “nëse Trump dëshiron”.
Duke kaluar në Kinë, Putin tha se marrëdhëniet e Rusisë me fqinjin e saj lindor kishin arritur një kulm historik dhe të dy vendet po koordinonin veprimet në skenën botërore.
“Në dekadën e fundit, niveli dhe cilësia e marrëdhënieve tona [Rusi-Kinë] kanë arritur një pikë që nuk ka ekzistuar kurrë gjatë gjithë historisë sonë,” tha ai.
Një pjesë e gjatë e konferencës u përqendrua në luftën në Ukrainë, ku Putini tha se ai ishte “i hapur për kompromise” për t’i dhënë fund luftës – megjithëse ishte e paqartë se çfarë mund të përfshijnë kompromise të tilla.
Forcat ruse po bëjnë përparim në vijën e frontit “çdo ditë”, tha ai, duke i përshkruar trupat e tij si “heronj”.
Ai foli gjithashtu për projektet e ndërtimit të Rusisë në zonat që ajo ka marrë nga Ukraina, duke pretenduar se standardi i rrugëve në rajonin ukrainas të Luhansk ishte përmirësuar shumë që kur u kap nga forcat e mbështetura nga Rusia në 2014.
I pyetur nga një anëtar i audiencës nëse Perëndimi kishte “marrë mesazhin” për ndryshimin e Rusisë në doktrinën e saj bërthamore, të cilën Putin e shtyu në nëntor , ai tha “ju duhet t’i pyesni ata”.
Doktrina e re bërthamore i lejon Rusisë të kryejë një sulm bërthamor ndaj çdo vendi, nëse mbështetet nga një fuqi bërthamore.
Kjo do të thotë nëse Ukraina do të nisë një sulm të gjerë ndaj Rusisë me raketa, drone ose avionë, kjo mund të përmbushë kriteret për një përgjigje bërthamore, siç mund të mund të ishte një sulm ndaj Bjellorusisë ose ndonjë kërcënim kritik ndaj sovranitetit të Rusisë, citon BBC.
