Muaji dhjetor është muaji i festave, që si simbol ka pemën e Vitit të Ri, një traditë kjo e vijuar prej vitesh, e cila hijeshon çdo shtëpi në festat e fundvitit.
Zbukurimet janë ato që tërheqin vëmendjen më tepër.
Sot është e lehtë të gjesh gjithçka, por dikur ishte e vështirë.
“Nuk ka pasur familje që s’e ka bërë. Shumicën e rasteve gjenim pisha, uleshim të bënim vargjet, shportat, bredhat. Pastaj çfarë të gjenim në shtëpi: fruta, mollë, portokalle, limonë,” thotë ish-mësuesja Lejla Uligaj Golemi.
Në ditët e sotme zbukurimet e pemës së Vitit të Ri kanë ndryshuar shumë, duke filluar që nga vargjet me dritat shumëngjyrëshe.
Por ish-mësuese shprehet se pema e dikurshme kishte më emocion se pema e ditëve të sotme.
“Pema e sotme për bukuri është më e bukur, se ka ndriçim, gjëra të shndritshme, por më e gjallë është ajo që bën me dorën tënde. Tani janë të gatshme,” thotë znj. Golemi.
Magjia e festave të fundvitit sjell një moment të veçantë rreth e rrotull pemës së Vitit të Ri, ku njerëzit afrohen për të uruar njëri-tjetrin e bashkë me të, një kujtim të përjetshëm stampuar në një foto./ S,M
