“Lidhur me projektin e Shqipërisë, qeveria do ta vazhdojë atë. Do të çohet përpara”. Kështu bëjnë të ditur burime nga Ministria e Brendshme e Italisë, në lidhje me vendimin e Gjykatës së Apelit të Romës për dërgimin në Itali të 43 emigrantëve që mbaheshin prej të premtes së kaluar në qendrën e Shëngjinit dhe Gjadrit.
“Gjykatat e Apelit shtyjnë vendimin për të fituar kohë”, thekson Ministria e Brendshme italiane duke iu referuar vendimit të Gjykatës së Romës që pezulloi ndalimin e emigrantëve.
Sot, anija SAR e Rojes Bregdetare italiane mori mbrapsht emigrantët dhe ata u lanë të lirë në tokën italiane.
Seksioni për familjen, të miturit dhe Mbrojtja Ndërkombëtare në Gjykatën e Apelit të Romës Seksioni për Personat, Familjen, të Miturit dhe Mbrojtjen Ndërkombëtare i Gjykatës së Apelit të Romës ka pezulluar “gjykimin për vlefshmërinë e ndalimit” lidhur me mbajtjen e 43 migrantëve që qëndronin të ndaluar që nga e premtja në qendrën shqiptare.
Seancat për konfirmimin e ndalimeve u zhvilluan pasditen e djeshme, ndërsa Gjykata vendosi për t’ia referuar çështjen Gjykatës Europiane të Drejtësisë.
Gjithçka i është lënë vendimit të radhës të Gjykatës Evropiane të Drejtësisë për vendet e sigurta.
Grupi i migrantëve që u sollën në qendrën e Gjadrit në Shqipëri vinte nga Egjipti dhe Bangladeshi.
Në motivimin e saj “për shtyrjen e gjykimit”, gjykata ka deklaruar në vendim se “ka marrë shënim kontradiktat interpretuese që janë shfaqur në sistemin juridik italian, të cilat lidhen me rregullimin e përcaktuar në Direktivën nr. 2013/32/BE, si dhe me raportin midis të drejtës së Bashkimit Evropian dhe asaj kombëtare, veçanërisht për hierarkinë e burimeve ligjore, që kanë ndikim të drejtpërdrejtë në këtë çështje gjyqësore”. “Për këtë arsye, për të siguruar zbatimin uniform të së drejtës së Bashkimit Evropian, është e nevojshme që çështja t’i referohet Gjykatës Europiane të Drejtësisë, sipas nenit 267 të Traktatit për Funksionimin e BE-së (TFBE)”.
Gjykata ka vendosur kështu të pezullojë “gjykimin e konfirmimit, duke lënë të pandryshuara efektet mbi vlefshmërinë e ndalimit, të cilat rrjedhin automatikisht nga përfundimi i afatit të parashikuar me ligj”./e.t
