Në selinë blu, negociatat për koalicionet parazgjedhore mes Partisë Demokratike dhe aleatëve të saj janë përshpejtuar në minutat e fundit, ndërsa afatet po ngushtohen. Pjesa më e madhe e këtyre bisedimeve ka të bëjë me kërkesat e aleatëve për vende të sigurta në listën e PD-së, ku shumë kërkesa duket se tejkalojnë atë që Sali Berisha ka menduar për koalicionin.
Berisha ka konfirmuar se aleatët do të kenë kandidatët e tyre, por kjo do të bazohet në një marrëveshje mbi rekordin elektoral, dhe siç tha ai, koalicioni nuk mund të krijohet duke shkelur këto standarde.
Në këtë klimë të tensionuar, marrëveshja politike me Ilir Metën duket e vështirë, veçanërisht pas ditës së dytë të negociatave, kur përfaqësuesit e Partisë së Lirisë u larguan pa arritur ndonjë marrëveshje konkrete. Tedi Blushi deklaroi se negociatat janë drejt përfundimit, por pa detaje të tjera.
Aleati i vjetër i PD-së, Fatmir Mediu, shprehu shqetësimin për vendin e sigurtë në listën e PD-së, duke theksuar se do të shqyrtojë opsionet, jo vetëm për faktin personal, por për të kontribuar në të gjithë territorin e Shqipërisë.
Nga ana tjetër, Vangjel Dule, edhe pse nuk ka arritur të arrijë një marrëveshje për kandidimet, ka njoftuar se do të ketë sa më shumë kandidate që do të kontribuojnë në koalicion.
I vetmi që ka arritur të mbyllë një marrëveshje deri tani është Agron Duka, i cili ka siguruar një vend në listë të mbyllur dhe një tjetër në listë të hapur për 10 qarqe.
Sali Berisha po shpejton për të mbyllur marrëveshjet, pasi afati për regjistrimin e koalicioneve parazgjedhore është më 3 mars./e.t
