Drejtoresha e Përgjithshme e Prokurimeve publike, Arlinda Pogaj mohon pretendimet e pavërteta të publikuara nga portalet, duke sqaruar se bashkëshorti i saj nuk ka asnjë lidhje me kompaninë fituese të tenderit. Ajo thekson se tenderi është zhvilluar në mënyrë të hapur dhe ligjore, pa asnjë ankesë nga pjesëmarrësit. Pogaj e konsideron këtë një sulm ndaj figurës së saj profesionale dhe personale, duke kërkuar nga mediat të ndalojnë përhapjen e lajmeve të rreme dhe të bazohen në fakte.
DEKLARATË
1. Bashkëshorti im nuk ka asnjë lidhje me kompaninë fituese të tenderit.
2. Procedura e tenderit është zhvilluar në mënyrë të hapur dhe të ligjshme.
Tenderi për shërbimin e ushqimit për efektivët ka qenë një procedurë e hapur elektronike, e publikuar në sistemin zyrtar të Agjencisë së Prokurimit Publik (www.app.gov.al). Çdo operator ekonomik ka pasur mundësinë të marrë pjesë, dhe nuk ka pasur asnjë ankesë për kriteret apo për vlerësimin e ofertave nga asnjë subjekt pjesëmarrës. Procesi ka vijuar në përputhje të plotë me rregullat ligjore për prokurimin publik.
3. Ky është një sulm i drejtpërdrejtë ndaj figurës sime profesionale dhe personale.
Është e papranueshme që në mungesë të fakteve të përdoret emri dhe imazhi im për të krijuar një perceptim të gabuar në publik. Ky sulm i pabazuar nuk cenon vetëm figurën time profesionale, por prek edhe jetën time familjare. Të përfshish familjarët e mi në një akuzë të tillë pa asnjë provë është jo vetëm e padrejtë, por edhe e papranueshme nga çdo standard etik dhe profesional i medias.
4. Kërkoj që portali të tërheqë menjëherë lajmin e pavërtetë dhe të ndalojë përhapjen e informacionit të rremë.
Ftoj median të trajtojë informacionet me përgjegjësi dhe bazuar në fakte, jo në spekulime dhe manipulime të qëllimshme.
Me respekt,
Arlinda Pogaj
