Ethet e listave kanë filluar në PD. Pasi përcolli aleatët, Berisha ka nisur të sajojë listat me kandidatët e primareve, dhe duhet të zgjedhë kë do të shpëtojë apo të djegë.
Tirana është e mbyllur, me më besnikët e Berishës. Nuk ka më vend për burra. Por me largimin e Metës nga Fieri, doktori mund të dërgojë Mediun ose Idrizin, për ti hapur një vend kandidatëve të primareve, mjekut Alimehmeti, kavajsit Kadiu apo djalit të Fahri Balliut.
Beteja e fortë është dhe për nje grua, mes Jorida Tabakut, Dhurata Çupit e Ilda Zhulalit.
Në Fierin e Bardhit, Meta do të dërgojë nje grua. Por nëse doktori katapulton njërin mes Mediut apo Idrizit, atëherë duhet të zgjedhë të djegë mes Sharkës apo deputetit Korreshi.
Në Durrës, po ashtu ka pikëpyetje. Luhen dy vende. Më te votuarit në primare dolën Igli Cara dhe Manjola Luku, por sërish doktori në krah mban zëdhënësen Floriana Garo, me 32 vota.
Cara, i cili është sakrifikuar disa herë në listat e hapura të PD, tha për ABC News se në çdo skenar nuk ka për tu tërhequr nga gara.
Elbasani rrezikon të mbetet pa përfaqësim në qytet, nëse doktori djeg Blendi Himçin apo Aurel Bylykbashin. Të sigurt janë Haxhinasto i Metës, Alizoti nga Berati, kurse më i votuari në primare doli Dashnor Sula nga Peqini.
Në Shkodër, Bardh Spahia u mund në primare nga dy rivalë lokalë. Ndërsa edhe aleati Nard Ndoka nuk është kundër listës së sigurt.
Në të gjitha rastet, doktorit i duhet të sakrifikojë besnikët me besnikë, ose të djegë më te votuarit e primareve.
Më i qetë doktori është për qarqet e tjera. Në Vlorë çoi grekun Dule, kurse në Korçë refuzoi Blushin e Metës për të shpëtuar Nallbatin.
Në Lezhë ish gjyqtari Gjin Gjoni, ndërsa në pikëpyetjë është për dy kandidatët më te votuar në primare në Dibër, Ilir Krosi dhe në Berat Zija Ismaili.
Gjirokastra e Kukësi skane diskutime pasi kanë vetëm një mandat të sigurt.
Një tjetër hall i doktorit ështe dhe lista e hapur, pasi përveç Metës dhe kandidatëve të primareve, duhet të zgjedhë edhe ku do të caktojë aleatët madhështorë. Vulën do e vendosë vetë, pasi të mbledhë të mërkurën si Kryesinë dhe Këshillin Kombëtar./e.t
