Në Buenos Aires ka nisur një nga gjyqet më të shumëpritura në Argjentinë, ku prokuroria ka akuzuara për vrasje mjekët të cilët po trajtonin legjendën Diego Armando Maradona kur ky i fundit u nda nga jeta.
Dhe prokurori i çështjes, Patrizio Ferrari, e ka nisur seancën e gjyqit ndaj stafit mjekësor me pamje tronditëse për të gjithë duke i vënë para përgjegjësisë për ndarjen nga jeta të legjendës së futbollit botëror.
“Shihni, kështu vdiq Maradona”, ishin fjalët e tij teksa tregonte një foto të madhe të kufomës së Maradonës, siç ishte gjetur e pajetë në banesën e tij. Aty dallohej qartësisht enjtja e kufomës, e cila sipas prokurorëve, tregon se gjendja ishte përkeqësuar më parë dhe vdekja nuk ishte rastësore siç pretendonin stafi mjekësor që po e trajtonte.
“Cilido prej të hetuarve që pohon se nuk kishte kuptuar se çfarë po i ndodhte Diegos, qartësisht po gënjen. Kushtet e tij ishin të dukshme”, tha ai me forcë, në pamjet që bënë xhiron e rrjetit pasi gjyqi po transmetohej drejtpërdrejtë në kanalin Youtube të gjykatës. Dhe duke parë ato pamje, vajzat Dalma e Gianinna të cilat ishin në sallë, shpërthyen të dyja në lot, të ngushëlluara nga e bija tjetër e legjendës, Jana.
Të hetuar janë 8 persona, të gjithë ata të cilët u morën me trajtimin e Maradonës në ditët e fundit të jetës. Gjyqi ka ngjallur aq shumë interes sa kur në gjykatë mbërritën të akuzuarit, një turme e madhe i priste te dera me thirrjet “vrasës”. Ndërsa edhe vajzat e Maradonës dhe ish-gruaja e tij, Veronica, kanë akuzuar hapur se ka pasur persona të tjerë të përfshirë. Ato kanë kërkuar të dinë se kush e kishte paguar këtë staf dhe shtëpinë ku po qëndronte Maradona, në të cilën edhe u nda nga jeta.
😰😰El arranque del juicio por el Caso Maradona nos ha dejado esta impactante imagen de su cadáver con la barriga hinchada en plena hipótesis de que fue asesinado: pic.twitter.com/xjiYmFu456
— BeSoccer (@besoccer_ES) March 12, 2025
Maradona u nda nga jeta më 25 nëntor 2020, në një shtëpi në një zonë rezidenciale në Tigres, si pasojë e një krize kardio-pulmonare. Ai gjendej në atë shtëpi duke u rehabilituar pas një ndërhyrje kirurgjikale për një hematomë në kokë./ D.C
