Në fundjavë kryedemokrati Sali Berisha premtoi se me PD në pushtet Shqipëria do të jetë vendi me taksat më të ulta në Europë.
Këtë të hënë në konfernecën me gazetarët, kryedemokrati detajoi më tej programin ekonomik më të cilin forca politike që ai drejton do t’i kërkojë votën qytetarëve në 11 Maj.
Berisha garantoi se projekti i tij nuk cenon sigurinë ekonomike të vendit.
Programi ekonomik i partisë demokratike ka si synim kryesor uljen e taksave për shqiptarët, pohoi kreu i PD, Sali Berisha në konferencën me gazetarët. Fillimisht ai u ndal tek tatimi i pagave.
“Do të zbatohet tatimi 10% mbi të ardhurat nga puna, duke përjashtuar 50 mijë lekët e para. Tatimi 10% mbi të ardhura të tjera, jo nga paga. Zero taksim mbi profesionet e lira dhe biznesin e vogël”, tha mes të tjerash Berisha, shkruan A2 CNN.
Më tej Berisha shpjegoi përfitimet që do të ketë biznesi i vogël, si pjesë e ofertës politike të Partisë Demokratike për zgjedhjet e 11 Majit.
“Tavani vjetor për tatim fitimin, zero për biznesin e vogël, do të jetë 18 milionë lekë, apo 500 euro në ditë. Kufiri i përjashtimit nga TVSH do të jetë po ashtu në masën 18 milionë lekë xhiro vjetore, apo 500 euro në ditë.
Ulje nga 15 në 2 % të taksës së shitje së pronës dhe për këtë qëllim krijimi i kadastrës fiskale për përcaktimin e çmimeve të referencës”, tha më tej Berisha.
Rrezikut se me uljen e taksave rrezikohet një destabilitet ekonomik për vendin, Berisha e mohoi në mënyrë kategorike.
“Ne japim garanci të plotë se, jo që nuk do të cenojë, por do të forcojë stabilitetin ekonomik, do krijojë masivisht punësim, do të nxisë masivisht prodhimin”, përfundoi Berisha.
Lajmet jo të mira nga Uashingtoni, ku raporti i Departamentit Amerikan të Shtetit e konsideron procedimin penal të Berishës si sukses të SPAK dhe i referohet hapur shpalljes së tij ‘non grata’ për korrupsion masiv, ngritën pikëpyetje mbi aktivitetin e strategut Chris LaCivita, që me përfshirjen e tij në fushatë ngjalli shpresat se do të ndikonte pranë Presidentit Trump për të ndryshuar qasjen e Shtëpisë së Bardhë ndaj Sali Berishës.
Por Berisha tha se “LaCivita është në aktivitet të plotë me PD”./e.t
