Eurodeputeti Fredi Beleri ka vendosur të ndjekë rrugën gjyqësore ndaj kandidatit të Partisë Socialiste në Qarkun Vlorë, Ardit Bido, duke e kallëzuar këtë të fundit për shpifje. Sipas tij, Bido ka shpifur duke përfshirë emrin e tij në masakrën e Peshkëpisë.
Reagimi i Ardit Bidos ka qenë i menjëhershëm dhe i vendosur. Në një deklaratë publike, ai thekson se e vërteta nuk lidhet me fushatat elektorale dhe se drejtësia do të flasë vetë.
“Fredi Beleri kishte humbur rreth 1 vit e gjysmë nga Tirana dhe nuk ishte paraqitur në asnjë seancë gjyqësore, as për padinë që i kam bërë unë, as për atë që më ka bërë ai mua. Tani që unë kandidoj për Partinë Socialiste në Qarkun Vlorë, vendosi të rikthehet për show-n e radhës”, shprehet Bido.
Ai thekson se procesi gjyqësor është i mirëpritur, pasi është i bindur se do të dalë fitues, duke i qëndruar fort bindjeve dhe deklaratave të tij.
“E vërteta është e tillë sepse është. Unë kam pasur qëndrimet e mia, kam qëndrimet e mia dhe do të kem gjithmonë qëndrime të lidhura me të vërtetën”, përfundon Bido
