Margarita Xhepa u lind më 2 prill 1934, në qytetin e Lushnjës, prej ku nisi edhe hapat e parë drejt karrierës së saj. Ishte vetëm 16 vjeç kur nisi të aktivizohej pranë Teatrit Popullor ku interpretoi role të spikatura si Ofelia tek “Hamleti” apo vajza e dytë tek Mbreti Lir.
Më së shumti Margarita Xhepa ka spikatur në rolet e nënave siç ishte “Zonja Mëmë” tek “Kush e solli Doruntinën”, Nëna tek “Përballë vetes” e Ruzhdi Pulahës e shumë të tjera.
Ka qenë njësoj e suksesshme në rolet e dramaturgjisë botërore, si Ofelia tek “Hamleti”, vajza e dytë tek “Mbreti Lir”, dado te “Romeo e Zhulieta”, mbretëresha Margaret te “Rikardi III”, të Shekspirit. Në rolet e tjera nga dramaturgjia botërore spikasin Klea tek “Dhelpra dhe rrushtë”, Lena tek Xhaxha Vanja, Ledi Milford tek “Luiza Miler” , zonja Lomen tek “Vdekja e një komisioneri (A. Miller), Ana Andrejevna tek “Revizori” (Gogol) etj.
Veç roleve në teatër, ka realizuar edhe mbi 40 role në kinematografi, duke punuar me shumicën e regjisorëve shqiptarë. Me Kristaq Dhamon xhiron “Vitet e para”, me Ibrahim Muçajn e Kristaq Mitron “Dimri i fundit”, “Tokë e përgjakur”, “Një djalë edhe një vajzë” dhe “Apasionata”, me Viktor Gjikën “Gjeneral gramafoni”, me Esat Musliun “Rrethi i kujtesës” dhe “Vitet e pritjes”, me Dhimitër Anagnostin “Gurët e shtëpisë sime”, me Piro Milkanin “Pranvera s’erdhi vetëm”, me Saimir Kumbaron “Koncert në vitin 1936” etj.
Aktorja Margarita Xhepa është nderuar me titujt “Artiste e Popullit”, “Mjeshtre e Madhe”, “Nderi i Kombit”, titulli “Gjergj Kastrioti Skënderbeu” etj. Në vitin 1997, interpretoi në filmin grek “Mirupafshim”, ku mori çmimin e nderit në Festivalin e filmit mesdhetar në Selanik.
Ajo është vlerësuar edhe me çmimin “Actor of Europe 2021” për interpretimin e saj në rolin e Zonjës Mëmë te shfaqja “Kush e solli Doruntinën”./ S,M
