Ilir Meta dha sot mesazh nga qelia për prezantimin e kandidatëve, vetë në listë të hapur. Në takim u vu re edhe prezenca e djalit të kreut të PL-së, Besar Metaj. Teksa mbante një pankartë-poster të të atit në dorë, ai dukej i angazhuar në fushatë. A do jetë drejtues i fushatës?
Tiranë– Partia e Lirisë prezantoi sot kandidatët e saj për deputetë, ku mesazh dha nga qelia edhe presidenti i saj.
Kryetari Ilir Meta, edhe pse në burg prej 21 tetorit 2024, ku me gjasë duket se do të qëndrojë deri në një vendim të ri të Gjykatës, kërkon që të zgjidhet deputet në 11 maj, nga listat e hapura të Tiranës.
Por në takim u vu re edhe prezenca e djalit të kreut të PL-së, Besar Metaj. Teksa mbante një pankartë-poster të të atit në dorë, ai dukej i angazhuar në fushatë.
Por a do të jetë Besar Metaj drejtuesi i fushatës elektorale të PL-së në kryeqytet, ku edhe i ati rrezikon shumë pasi është renditur në listën e hapur dhe jo të sigurt të koalicionit me PD-në, “Aleanca për Shqipërinë Madhështore”?
Ish-bashkëshortja Monika Kryemadhi, ka postuar një foto të djalit me posterin e Metës, duke thënë se “ai po tregon burrëri”.
Edhe pse e ndarë nga Meta dhe e përjashtuar nga partia pikërisht nga ish-bashkëshorti, Kryemadhi bën thirrje që shqiptarët të votojnë për Ilir Metën.
“Marrja e përgjegjësive është jo vetëm virtyt, por edhe burrëri. Sot ti ke treguar edhe një herë që je rritur. Bravo Besar Metaj, jam krenare për ty. Voto Ilir Metaj”, shkruan Kryemadhi në postimin e saj, në llogarinë personale të rrjetit social.
Ilir Meta arriti të siguronte 4 deputetë në listat e mbyllura të koalicionit, nga të cilët 2 në Tiranë Tedi Blushin dhe Erisa Xhixhon, Edmond Haxhinaston në Elbasan e Brunilda Haxhiun në Fier, ndërsa një sërë kandidatësh të tjerë përfaqësojnë PL-në në listat e hapura.
Kjo forcë politike u trondit disa muaj më parë nga arrestimi i Metës me urdhër të SPAK për 3 vepra penale, korruspion, pastrim parash dhe fshehje pasurie./k.k
