Kryeministri Albin Kurti, së bashku me ministrin e Punëve të Brendshme, Xhelal Sveçla, dhe zëvendësministrin e Mjedisit, Planifikimit Hapësinor dhe Infrastrukturës, Jeton Raka, vizituan sot familjen e rreshterit të Policisë së Kosovës, Muhamed Lika, i cili humbi jetën tragjikisht më 1 prill.
Gjatë vizitës, kryeministri u prit me respekt dhe falënderime nga familja për mbështetjen institucionale. Ai e vlerësoi shumë figurën e të ndjerit dhe theksoi kontributin e tij si pjesëtar i Policisë së Kosovës dhe si luftëtar i Ushtrisë Çlirimtare të Kosovës. “Rreshteri Muhamed Lika ka kontribuar shumë për ruajtjen e rendit dhe ligjit, si dhe për sigurinë e qytetarëve dhe shtetit tonë. Po ashtu, ai dha kontributin e tij si luftëtar i UÇK-së për lirinë e popullit dhe vendit tonë. Vrasja e tij do të hetohet dhe autorët do të gjykohen dhe dënohen. Emri i tij do të kujtohet dhe nuk do të harrohet”, shkroi Kurti në librin e ngushëllimeve.
