Koalicioni Euroatlantik i Lulzim Bashës ka depozituar një kallëzim në SPAK kundër kandidatit të Sali Berishës për deputet në Durrës, Arjan Ndoja. Sipas kallëzimit, Ndoja dyshohet për “korrupsion aktiv në zgjedhje” dhe “kanosje ndaj pjesëmarrësve në zgjedhje”, duke ushtruar presion ndaj qytetarëve për të mos votuar për partitë e tjera dhe duke kërcënuar ata me lidhje të pretenduara me botën e krimit.
Koalicioni kërkon që SPAK të nisë hetimet dhe të mbrojë integritetin e zgjedhjeve të 11 majit, duke e cilësuar si të papranueshëm ndikimin e grupeve kriminale në procesin zgjedhor. Ata gjithashtu bëjnë thirrje për veprime të shpejta dhe të vendosura nga Prokuroria e Posaçme.
Kujtojmë se Arian Ndoja iu bashkua procesit të primareve të Sali Berishës dhe ish-kryeministri e katapultoi në listat e hapura të qarkut të Durrësit për zgjedhjet e 11 majit. Ish-prokurori ishte objektiv edhe i një atentati në nëntor 2019 në rrethrrotullimin e Shkozetit. Ndoja u shkarkua më 6 maj të vitit 2022 nga Komisioni i Vettingut i shkallës së parë për lidhje të shumëfishta me krimin por edhe për pasuri të pajustifikuar. Sipas vendimit, prokurori Ndoja kishte kontrate me të paktën 9 persona të dyshuar dhe të përfshirë në veprimtari të paligjshme./E.S
