Deputeti Dashnor Sula ka deklaruar se Partia Demokratike do të ketë një numër më të vogël votash në zgjedhjet e 11 majit, krahasuar me ato të vitit 2021. Në një intervistë televizive, ai kujtoi mbështetjen që kishte marrë në zgjedhjet e kaluara, sidomos nga elektorati gri, dhe shprehu bindjen se mungesa e tij si kandidat do të ndikojë në rënien e mbështetjes për PD-në.
“Në vitin 2021 kam marrë rreth 9,000 vota që tregojnë mbështetje të fortë, kryesisht nga elektorati gri. Nëse unë do isha kandidat në Peqin, Belsh dhe Cërrik, diferenca mes PS dhe PD nuk do të kalonte 300 vota. Tani mund të jetë deri në 10 mijë vota diferenca,” u shpreh ai.
Sula sqaroi se nuk do të angazhohet me asnjë forcë tjetër politike deri më 11 maj, por tha se nuk është as i përfshirë në fushatën e PD-së, duke akuzuar drejtuesit aktualë të kësaj force për injorim të kontributit të tij.
“Berisha dhe bashkëpunëtorët e tij injoruan kontributin tim dhe menduan se jam i padobishëm. Në rast fitoreje do marrin meritat vetë, në rast humbjeje po ashtu përgjegjësinë. Kjo është arsyeja pse nuk jam pjesë e kësaj gare, megjithëse kam pasur rezultate të mira sa herë kam kandiduar,” theksoi Sula./ S,M
