Instituti i Kosovës për Drejtësi (IKD) ka reaguar pas dështimit të seancës së sotme konstituive të Kuvendit të Republikës së Kosovës. Sipas IKD-së, shkak për këtë u bë “mosvotimi i Raportit të Komisionit për Verifikimin e Mandateve dhe Kuorumit, me arsyetimin se Kryeministri dhe akterët qeveritar nuk dhanë dorëheqje nga pozitat e tyre në Qeverinë e Republikës së Kosovës”.
Në reagimin zyrtar, IKD ka vënë në dukje paqartësitë të hasura në dokumentin e dorëheqjes së kryeministrit Albin Kurti nga posti me qëllim betimin e tij si deputet i Kuvendit të Kosovës për legjislaturën e 9-të.
“Letra e dorëzuar nga Kryeministri në detyrë, z. Albin Kurti, nuk paraqet akt të dorëheqjes. Interpretimi i z. Kurti se Qeveria e tij ka statusin ekuivalent me Qeverinë në detyrë vlenë për Qeverinë si institucion dhe jo për të si kreu i saj. Përmbajtja e njoftimit të Kryeministrit tregon synimin e tij që ai të vazhdojë ta udhëheqë Qeverinë në detyrë edhe duke qenë deputet.
Në bazë të Ligjit NR.08/L-117 për Qeverinë e Republikës së Kosovës, Kryeministri duhet të jap dorëheqje në momentin e betimit të tij si deputet. Nga ky moment, Qeveria do të vazhdojë të funksionojë si qeveri në dorëheqje, por se nuk mund të udhëhiqet nga z. Kurti. Udhëheqja në këtë rast kalon tek zv. Kryeministri i Qeverisë në detyrë dhe postet ministrore udhëheqen nga zv. Ministrat. Përjashtim bëjnë rastet kur një ministër nuk është zgjedhur deputet, në këtë rast, ai mund të vazhdojë të ushtrojë detyrën”, thuhet në njoftim.
Instituti i Kosovës për Drejtësi shkruan se e njëjta letër duhet t’i dorëzohet me rregullore kryetarit të Kuvendit të Kosovës, ndërsa referuar rastit kur kryetari i ri ende nuk është zgjedhur, kërkesa e dorëheqjes i dorëzohet kryesuesit të seancës konstituive, që sipas rregullores duhet të jetë deputeti më i vjetër, e që në këtë rast është Avni Dehari.
Doreheqja e firmosur nga Albin Kurti/E.S
