Në studion e “Real Story” u diskutuan të dhënat e sondazhit të publikuar të hënën në ABC News, sondimi ky i kryer në bashkëpunim me kompaninë prestigjioze italiane të sondimit, Angi Ricerche të dhënat këto që tregonin se Partia Socialiste krijon shumicën e vetme në betejën elektorale të 11 majit.
Analisti i njohur Roland Lami, u shpreh se duke parë bjerrjen e madhe të Partisë Demokratike, ka gjasa që këto zgjedhje të prodhojnë një opozitë të re, e cila të shërbejë më pas në garat e ardhshme si alternativë qeverisëse.
“Unë do shpresoja që të lindi një opozitë e re, sepse në kushtet kur unë shoh që opozita, PD, që nuk është në gjendje të fitojë, dilema është se çfarë do të ndodhë me këtë parti nesër pasi ne na duhet opozicioni, nuk na duhet thjesht për statistikë, por na duhet të krijojë nesër një alternativë qeverisës dhe të ushtrojë presionin tek qeveria dhe të krijojë idenë se unë nesër qeverisi më mirë se sa ty. Mund të na krijohet një pol i tretë me këto zgjedhje dhe gjasat për mua janë që të ndodh”, tha ai.
Por, ndryshe nga Lami, analisti Frrok Çupi nuk shikon shtigje që mund të krijohet një alternativë e re.
“Nuk shikoj se po lind një alternativë. Tektonikë ka, zhurma ka, luftë ka, etj etj. Nuk janë zëra se po lind një gjë, por janë zëra që po zihen, janë zëra se po luftojnë. Fakti që ka shumë shifra, është se ka shumë zhurmë.
Opozitë e re mund të lind pasi të “vdesin” edhe këta. Praktikisht, sidomos në të djathtën, është provuar disa herë prej vitit 1990 të dalin parti për shkak të grindjeve. Do ta shikojmë se një pjesë e tyre nuk do lindin dot as kësaj here.
Po pjesëtohet e keqja në PD. Nuk arriti dot të bëhet alternativë gjatë këtyre viteve dhe e ka të vështirë të bëhet alternativë, jo vetëm ajo”, tha ai./E.T
