Sipas të dhënave nga Salla e Shtypit e Vatikanit, deri këtë mëngjes, mbi 128,000 besimtarë kanë kaluar për të nderuar arkivolin e Papës Françesku.
Pjesëmarrja vazhdoi gjatë gjithë natës, ndërkohë që Bazilika e Shën Pjetrit u mbyll vetëm nga ora 4 deri në 5:45 të mëngjesit për t’u pastruar.
Hyrja në kishë do të lejohet deri në orën 7 të pasdites. Një orë më vonë do të mbahet ceremonia për mbylljen e arkivolit prej druri.
Ndërkohë, vazhdojnë takimet e kardinalëve në Vatikan, ku, siç theksohet, diskutojnë çështje që kanë të bëjnë me realitetin kishtar dhe atë botëror. Këto janë “përgatitje” dhe kontakte që lidhen drejtpërdrejt me konklavin, i cili pritet të nisë pas datës 5 maj.
Nga sot në mesditë, pritet të arrijnë në Romë liderët ndërkombëtarë që do të marrin pjesë në funeralin e Papës nesër.
Presidenti amerikan Donald Trump tha dje se “do të dëshironte të shihte të gjithë liderët që do të vijnë në kryeqytetin italian”. Megjithatë, sot në mëngjes, Shtëpia e Bardhë shpalli programin e tij zyrtar, i cili nuk përfshin ndonjë takim të drejtpërdrejtë, dypalësh./E.S
