Kryetari i Partisë Socialiste, Edi Rama zhvilloi një takim në Velipojë me përfaqësuesit e bizneseve në një fazë shumë pozitive të ekonomisë kombëtare dhe vendore, falë hovit të turizmit po jo vetëm.
“Të ardhurat do rriten në mënyrë të jashtëzakonshme, ashtu sikurse rritet ndjeshëm dhe mundësia për të paguar shumë më tepër stafet, sepse e gjitha lidhet me cilësinë. Unë do ju thoja të synoni maksimumin e cilësisë. Ne do jemi shumë mbështetës për zhvillimin e këtyre hapësirave të reja. Kemi bërë shumë gabime në të shkuarën. Janë gabime që i bën çdo vend.
Jam dakord që kjo është një nga zonat më të bukura të Europës. Kjo meriton një zhvillim në standardet më të larta të Europës.
Projekt tjetër që kemi dakordësuar, me Pjerinin që ka urdhëruar dhe unë kam pranuar ta zbatoj, është projekti i lidhjes së zonës së talës me bregdetin, përmes rrugëve perpendikulare, ku faktikisht nuk ka infrastrukturë që të mbështesë këto zhvillime, ndërkohë deri dje s’ka pasur nevojë të kishte. Dhe Bypass-i i Shëngjinit, që është një kërkesë e Markut, desha të thoja shokut Mark, po është z.Mark se nuk bëhet shok ky. Është nga ata të paepurit e ‘Liri Demokracisë’”, tha ndër të tjera Rama./E.S
