Pas publikimit të kontratës së lobimit të PD në SHBA, Sali Berisha nuk tha asnjë fjalë për 6 milionë dollarë që do t’i paguhen kompanisë së njerëzve të afërt të Trump, nga të cilat 750 mijë dollarë janë parapaguar. Nga një takim elektoral në Kuçovë, Berisha foli shkurt për kontratën duke thënë se Rama është tmerruar se Partia Demokratike ka marrë avokatin e Donald Trump si avokat të votës së shqiptarëve, por këtyre të fundit nuk u tregoi se cili është burimi i kësaj shifre të kamur, edhe pse PD në një reagim zyrtar pretendoi se shuma po paguhet komuniteti shqiptaro-amerikan.
“Kryestrategu i fushatës më të suksesshme elektorale në historinë e njerëzimit, rikthimit të Presidentit Donald Trump, Chris LaCivita, i ra kokës me grushta atë ditë që doli Chris LaCivita në konferencën e shtypit. Por miq, këto dy ditë është i tmerruar më shumë, sepse Partia Demokratike ka marrë për avokat të kauzave tuaja të drejta, për avokat të kauzës së drejtë të çdo shqiptari dhe votës së lirë të shqiptarëve, avokatin e Presidentit Donald Trump.”-tha Berisha.
Më tej Berisha premtoi grante për sipërmarrësit e rinj, mbulim të interesave për kredi banese dhe subvencione për punësim. Ai theksoi është i orientuar bashkë me demokratët drejt ringritjes ekonomike të vendit përmes fuqizimit të brezit të ri.
“Ne garantojmë se shkollimi i fëmijëve tanë do të zhvillohet në kushte moderne, në shkolla të pajisura me teknologji të reja dhe me cilësi të lartë. Do të dyfishojmë buxhetin për arsimin dhe do të heqim mesataren si një pengesë absurde që i ndalon të rinjtë të hyjnë në universitete. Përkundrazi, dyert e universiteteve do të jenë të hapura për të gjithë, dhe pas diplomimit, çdo sipërmarrës që punëson të rinjtë do të mbështetet nga qeveria me një vit sigurime shoqërore të paguara për çdo të ri të punësuar.
Qeveria do të ofrojë grante për çdo biznes dhe startup të të rinjve tanë. Do të vendosim grante për çdo kredi për banesë, në mënyrë që çdo çift i ri të ketë mundësi të ndërtojë jetën në vendin e tij. Do të mbulojmë deri në 30 mijë euro interesat e kredive, dhe për familjet që sjellin në jetë fëmijën e tretë, shteti do të marrë përsipër shlyerjen e plotë të kredisë”. m.p.
