Pagesë korrupsioni e ka cilësuar avokati Spartak Ngjela, pagesën prej 6 milionë dollarë të Partisë Demokratike për lobim në SHBA.
I ftuar ditën e sotme në emision ‘Studio Live’, në Report Tv me gazetarin Arbër Hitaj, Ngjela tha se Berisha duhet ta provojë këtë çështje përballë SPAK.
“Të vështirë do ta ketë, duhet që ti bëjë dokumetet të qarta. Duhet të jetë në një situatë të rëndë sepse ai është non grata dhe kjo lloj pagese është korrupsion dhe prandaj i është përgjigjur edhe Uashintoni. Nëse kjo është e vërtetë, ai është në një gjendje të vështirë. Nëse ajo ka ardhur nga Amerika, ky e ka të vështirë, duhet ta provojë përballë SPAK. Berisha është non grata, ka paguar 6 milionë, kujt ia ka paguar?”, tha ai.
Ngjela tha se Berisha është në hall të madh, pasi është edhe në një proces penal. Ai tha se një person që është non grata nuk mund të bëhet kryeministër në Shqipëri.
“PS nuk bënë fare fushatë dhe tallet sepse e ka të sigurt. Ju mendoni se mund të bëhet kryeministër në Shqipëri një individë që mund të bëhet non grata në Amerikë. Shqipëria është zonë në interes Amerikan. Duhet që të mëshironi njeriun që është në hall, Saliu është në hall, është në një proces penal dhe këto ditë bëhet gjyqi. Po këtu SPAK-un e drejton Uashingtoni, ata e kanë marrë përsipër që të vendosin drejtësinë dhe jo padrejtësinë këtu. Edhe Trump që erdhi në pushtet, i ktheu ekspertët që janë në SPAK, dhe tani shpresohet se do të vendosin pushtetin gjyqësor në Shqipëri”, tha ai.
Një koment e pati edhe partitë e reja. Ngjela tha se në Shqipëri janë vetëm 2 parti, duke iu referuar PD dhe PS ndërsa të tjerat sipas tij janë fllucka sapuni.
“Shqipëria është dypolare si perëndimi, dy parti janë, të tjerat janë fllucka sapuni. Edhe në Shqipëri janë dy parti një e majtë dhe një e djathtë. Çdo njeri mund të krijojë një parti dhe mund të marrin një ose dy deputet ose nuk marrin fare dhe këta kanë krijuar një parti dhe kanë dëshirë për të hyrë në politikë”, tha ai. m.p.
