Dy shtetas të huaj janë ekstraduar nga Shqipëria drejt Greqisë dhe Turqisë të akuzuar për vepra të rënda penale si “birësim të paligjshëm” apo “kryerja e marrëdhënieve seksuale me dhunë”.
Ekstradohet drejt Turqisë 39-vjeçari Burak Kara i dënuar me 8 vite e 4 muaj burgim pasi në vitin 2011 ka kryer marrëdhënie seksuale në një shtetase turke teksa ishte në gjendje të dehur. Nga dënimi fillestar, Burak Kara ka për të vuajtur dhe 4 vite e gjysmë.
Gjithashtu është ekstraduar drejt Greqisë 59-vjeçari me iniciale E. A., pasi në bashkëpunim me shtetas të tjerë, gjente gra shtatëzënë në vështirësi ekonomike, i dërgonte në Greqi për të lindur e më pas ndërmjetësonte në dhënien e fëmijës së tyre për birësim në forma të paligjshme.
Nga kjo veprimtari kriminale ky shtetas dyshohet të ketë përfituar shumat 2000-4000 për çdo rast.
Njoftimi i policisë:
Interpol Tirana/Ekstradohen në Turqi dhe në Greqi, 2 shtetas.
-Në Turqi u ekstradua një shtetas i dënuar për marrëdhënie seksuale me dhunë.
-Në Greqi u ekstradua një shtetas i akuzuar për ndërmjetësim për birësim të kundërligjshëm.
Si rezultat i koordinimit të veprimeve operacionale të Interpol Tiranës me homologët e Interpol Ankarasë dhe Interpol Athinës, u finalizuan procedurat për ekstradimin nga Shqipëria, të shtetasve:
-Burak Kara, 39 vjeç, i lindur në Turqi, sepse Gjykata e Mersin, në vitin 2022, e ka dënuar këtë shtetas, me 8 vjet e 4 muaj burgim, pasi në vitin 2011, në gjendje të dehur, ka kryer marrëdhënie seksuale me dhunë, me një shtetase turke, në banesën e një shtetaseje tjetër, gjithashtu turke, në Mersin. Nga dënimi, 39-vjeçarit i kanë mbetur për të vuajtur rreth 4 vjet e gjysmë burgim;
-I. A., 59 vjeç, i lindur në Bullgari, sepse ishte shpallur në kërkim ndërkombëtar nga Interpol Athina, mbi akuzën se në bashkëpunim me të tjerë, gjente gra shtatëzënë (në vështirësi ekonomike), të cilat i çonte në Greqi për të lindur dhe më pas ndërmjetësonte për dhënien e foshnjës, për birësim. Nga kjo veprimtari kriminale ky shtetas dyshohet se ka përfituar 2000-4000 euro/rast. Ai është arrestuar nga shërbimet e Policisë Kufitare të Korçës./E.S
