Kryetari i Partisë Demokratike, Sali Berisha, vijoi fushatën e tij për zgjedhjet e 11 majit në Burrel.
Kryedemokrati u ndal te rritja e pensioneve, duke e krahasuar Shqipërinë me Kosovën, qeveria e së cilës ndau 100 milionë euro për pensionistët.
“Albin Kurti, një kryeministër tjetër shqiptar në Prishtinë, të njëjtin muaj, ndau për gratë dhe burrat e thinjur të Kosovës, jo 16, por 100 milionë euro dhe rriti pensionet e tyre 20%. Ra në humnerë Kosova? Jo.
Pse u ndala këtu? Nuk janë çështje partiake këto. Dhembshuria nuk është virtyt i një partie. Dhembshuria është virtyt i qenies njerëzore. Kush ka shpirt, e ka ndjenjën e dhembshurisë. Me 100 euro, 150 euro nuk mbyll dot muajin, nuk merr dot ilaçe për mjekim, nuk ushqen dot nipin ose mbesën.
Po këta, çfarë bëjnë? Fondet, paratë tuaja, pensionet tuaja, rrogat tuaja i vjedhin, i vjedhin dhe vetëm i vjedhin. Po ndërtojmë rrugë thotë. Aty janë vjedhjet më të rëndësishme miq”, tha ndër të tjera Berisha./E.S
