Qarku i Lezhës ka votuar në favor të Partisë Demokratike, duke e kthyer hartën e tyre në ngjyrë blu për këto zgjedhje parlamentare.
Partia Demokratike ka arritur të fitojë në këtë qark 4 mandate, ndërsa e dyta vjen Partia Socialiste me 3 mandate. Partitë e tjera nuk kanë arritur të fitojnë vota të nevojshme për t’u përkthyer në mandate për ‘to.
Gazetari Martin Marku, raporton se në Bashkinë e Mirditës ka nisur numërimi i votave për kandidatët e zgjedhur nga qytetarët, që do përfaqësojnë qarkun në Parlamentin e ardhshëm. Normalisht duke qenë se sapo ka nisur numërimi, nuk ka ende një emër konkret që mund të zejë një karrige të sigurt në Kuvend.
“Kanë përfunduar të gjitha kutitë e votimit, për sa i përket numërimit për subjektet politike në 4 KZAZ-të përkatëse të qarkut të Lezhës, por ajo çfarë vlen të theksohet është se është Bashkia e Mirditës e cila ka nisur tashmë me kutitë e para, për ata të cilët janë kandidatë në lista të këtyre subjekteve politike. Por, nuk kemi ende një rezultat se sapo ka nisur numërimi për preferencat e qytetarëve të cilët do të zgjedhin se cilin prej kanditatëve të tyre, pra kanë zgjedhur tashmë, do t’i përfaqësojë në Parlamentin e Shqipërisë, si nga ana e PD, si nga ana e PS”, raporton gazetari.
Edhe pse në qarkun e Lezhës ka dominuar Partia Demokratike, ajo ndiqet nga Partia Socialistët me një numër votash jo shumë të largët. PD ka fituar 44.77% të votave, ndërsa PS 42.51%. Demokratët kanë fituar me një ndryshim prej 1899 vota më shumë se PS./e.s
