Shkencëtarët kanë ngritur alarmin për gjendjen e rënduar të shëndetit tek adoleshentët në mbarë botën. Një studim i publikuar në revistën The Lancet tregon se shëndeti i kësaj grupmoshe ndodhet në një pikë kritike, dhe paralajmëron se pa ndërhyrje të menjëhershme, deri në vitin 2030 gjysma e adoleshentëve në botë do të përballen me probleme serioze shëndetësore.
Sipas raportit, ky brez i ri po rritet për herë të parë në një realitet të formuar nga ndryshimet klimatike, përhapja e teknologjisë digjitale dhe pabarazitë sociale. Këto kushte kanë sjellë kërcënime të reja për shëndetin dhe mirëqenien e tyre.
Rritje alarmante e obezitetit
Në shumë vende afrikane dhe aziatike, numri i adoleshentëve që vuajnë nga mbipesha apo obeziteti është rritur deri në tetë herë gjatë tridhjetë viteve të fundit. Parashikimet tregojnë se deri në vitin 2030, 464 milionë adoleshentë do të jenë mbipeshë – një rritje prej 143 milionë krahasuar me vitin 2015.
Shëndeti mendor në rënie
Edhe shëndeti mendor është në krizë. Deri në vitin 2030, pritet që problemet mendore dhe vetëvrasjet të shkaktojnë humbjen e 42 milionë viteve jetë të shëndetshme. Kjo është një rritje me dy milionë vite krahasuar me të dhënat e vitit 2015.
Mungesë investimi për adoleshentët në vendet më të varfra
Në vendet me të ardhura të ulëta dhe të mesme, adoleshentët përbëjnë më shumë se 25% të popullsisë dhe mbajnë mbi 9% të barrës globale të sëmundjeve. Megjithatë, këto vende marrin vetëm 2.4% të ndihmës globale për zhvillim, duke lënë pas dore nevojat e kësaj grupmoshe.
Teknologjia: mundësi dhe sfida
Raporti thekson se teknologjia ofron mundësi për edukim, punësim dhe komunikim, por paralelisht edhe rreziqe. Shumë nga përvojat sociale dhe emocionale të adoleshentëve ndodhin online, çka mund të dëmtojë zhvillimin e tyre të shëndetshëm nëse nuk menaxhohet siç duhet.
Në përfundim, Komisioni i “Lancet” thekson rëndësinë e përfshirjes së vetë të rinjve në krijimin e politikave dhe zgjidhjeve që ndikojnë drejtpërdrejt në jetën e tyre. Ata duhet të kenë të drejtën të dëgjohen dhe të përfaqësohen në çdo vendimmarrje që lidhet me ta./E.Ç
