Një raport i mbështetur nga kryebashkiaku i Londrës, Sadiq Khan, bën thirrje për dekriminalizimin e posedimit të sasive të vogla të kanabisit për përdorim personal.
Raporti i Komisionit të Londrës për Drogën, i udhëhequr nga Lord Falconer, përmban 42 rekomandime që përfshijnë heqjen e kanabisit natyral nga Akti i Keqpërdorimit të Drogave dhe klasifikimin e tij nën Aktin e Substancave Psikoaktive.
Sipas raportit, dënimet aktuale ligjore për posedim janë “të tepërta”, ndërsa praktikat e policimit si ndalimi dhe kontrolli po përdoren në mënyrë joproporcionale ndaj komuniteteve të caktuara racore.
Komisioni kërkon më shumë fokus në edukim, kujdes shëndetësor dhe akses të përmirësuar në kanabisin mjekësor. Lord Falconer theksoi se legalizimi nuk është qëllimi, por përdoruesit nuk duhet të përballen me ndëshkime penale.
Kritikët, si David Raynes nga Aleanca Kombëtare për Parandalimin e Drogave, paralajmërojnë se çdo hap drejt dekriminalizimit mund të dërgojë mesazhe të rrezikshme, sidomos për të rinjtë.
Sadiq Khan tha se është koha për një qasje më të drejtë dhe të bazuar në prova, duke kërkuar reforma në politikën ndaj drogës. Ndërkohë, qeveria qendrore nuk ka shfaqur gatishmëri për ndryshime ligjore në këtë drejtim./E.T
