Catherine Paiz, e njohur nga kanali “The ACE Family”, ka rrëfyer hapur për tradhtitë e ish-bashkëshortit të saj, Austin McBroom, gjatë një interviste në podkastin “Call Her Daddy”.
Ajo zbuloi se për vite me radhë kishte dyshuar për sjelljen e Austin-it, por i injoronte thashethemet për hir të familjes dhe biznesit të përbashkët. Sipas saj, Austin e manipulonte duke i thënë që po e ekzagjeronte dhe “do e bënte më keq” nëse fliste. Megjithatë, shenjat ishin të qarta: zëra vajzash në sfond, mesazhe misterioze në telefon dhe video në internet që sugjeronin sjellje të pahijshme gjatë udhëtimeve.
Catherine rrëfeu se, për shkak të mungesës së sinqeritetit dhe tradhtive, ata nuk kishin pasur intimitet për më shumë se pesë vite. “Trupi im është një tempull,” tha ajo, duke shtuar se nuk ndjente më siguri për të ndarë intimitetin me dikë që nuk ishte besnik.
Megjithatë, ajo pranoi edhe gabimet e saj, duke theksuar se nuk kërkoi ndihmë profesionale në kohë. “Nuk është normale të kalosh vite pa intimitet,” tha Catherine, duke nënvizuar se mungesa e komunikimit e thelloi krizën.
Pavarësisht se Austin publikoi një video ku pranoi fajin, ai pretendoi se Catherine ishte në dijeni të gjithçkaje, çka ajo e mohoi kategorikisht në podkast: “Nuk e kam pranuar kurrë tradhtinë. Nuk do të isha kurrë dakord me të.”
Çifti, të cilët janë prindër të tre fëmijëve, janë ndarë pas rreth shtatë vitesh bashkëjetesë./E.Ç
