Shqipëria kryeson vendet evropiane për rritjen më të fortë të numrit të netëve të kaluara në strukturat e akomodimit turistik në tremujorin e parë të këtij viti. Sipas një publikimi të fundit të Eurostat, vendi ynë ka regjistruar një rritje prej 33.3% të netqëndrimeve, krahasuar me tremujorin e parë të vitit 2024.
Ndërkohë, BE-ja, për periudhën janar-mars 2025, ka pasur 1.1 milionë netqëndrime më pak, ose thënë ndryshe, një rënie me 0.2%.
Sakaq, në Shqipëri, këtë tremujor janë regjistruar afro 751 mijë netqëndrime.
Peshën më të madhe të tyre e zënë turistët e huaj, me 480 mijë.
Pikërisht turistët e huaj kanë shënuar edhe rritjen më të madhe të netqëndrimeve krahasuar me vitin e kaluar, duke bërë që Shqipëria të udhëheqë.
Sipas Eurostat, netqëndrimet e vizitorëve ndërkombëtarë janë rritur me 37.7%, duke tejkaluar bindshëm mesataren e BE-së, që është vetëm 1.1%.
Ndërsa vendet me traditë në turizëm, si Greqia, Italia apo Spanja, kanë njohur një rritje me më pak se 10% të netëve të kaluara në strukturat e akomodimit turistik nga të huajt./e.t
