Ministri i Drejtësisë, Ulsi Manja ka marrë pjesë sot në Konferencën e Kryetarëve të Gjykatave të Larta të vendeve të Europës Qendrore dhe Lindore që u mbajt në Shqipëri pas 13 vitesh.
Përmes një postimi në rrjetet sociale, Manja tha se gjatë kësaj Konference ka theksuar përkushtimin e vendit për një sistem drejtësie të besueshëm, efikas dhe të digjitalizuar.
Ministri vuri theksin te suksesi i reformave, të cilat kanë hapur rrugën për një sistem të konsoliduar, ndërsa nënvizoi zbatimin e një strategjie për për reduktimin e çështjeve të mbartura dhe digjitalizimin e shërbimeve gjyqësore.
Postimi i plotë i ministrit Manja:
Shqipëria, në rrugën e drejtësisë europiane dhe globale!
Nga Vlora, në Konferencën Ndërkombëtare të Kryetarëve të Gjykatave të Larta të vendeve të Europës Qendrore dhe Lindore, e organizuar nga Gjykata e Lartë e Republikës së Shqipërisë dhe CEELI, ndava vizionin tonë për një sistem drejtësie të besueshëm, efikas dhe të digjitalizuar.
Reforma në drejtësi dhe përmbyllja me sukses e procesit të vettingut kanë hapur rrugën për një sistem të konsoliduar.
Po zbatojmë një strategji të qartë për reduktimin e backlog-ut dhe digjitalizimin e sistemit gjyqësor.
Në vitin 2027, Shqipëria do të jetë mikpritëse e Kongresit Botëror të Drejtësisë, si dëshmi e progresit tonë të qëndrueshëm./e.t
