Hetuesit e Prokurorisë së Palermos, në Itali, kanë zgjedhur teknologjitë e reja për të nxjerrë ADN-në nga një gjurmë e gjetur 45 vjet më parë, në vendin ku u vra vëllai i presidentit aktual të Italisë, Piersanti Mattarella.
Ngjarja ka ndodhur më 6 janar 1980 dhe 12 qershorin e ardhshëm, hetuesit do të ngarkohen me detyrën për të bërë krahasimin e gjurmës biologjike të gjetur në skenën e krimit.
Konkretisht, gjurma në fjalë u gjet në derën e anës së shoferit të një makine tip “FIAT 127”, e përdorur nga vrasësit për t’u larguar nga vendngjarja. Menjëherë pas vrasjes, gjurma u arkivua pasi u konsiderua e papërdorshme për të zbardhur identitetin e personit që e kishte lënë.
Por sot ekspertët janë të bindur se ajo mund të përdoret për ta krahasuar me ADN-në e personave të hetuar Antonio Madonia dhe Giuseppe Lucchese, dy vrasësit e Cosa Nostra-s, që dyshohen se i qëlluan Mattarella-s, asokohe guvernator i rajonit të Sicilisë.
Nga hetimet e derimësotme janë ngritur dyshimet se automjeti i përdorur nga dy atentatorët, që atëherë ishin të moshave 28 dhe 22 vjeç, drejtohej nga Lucchese, figurë e spikatur e fraksionit mafioz të korleonezëve.
Por asgjë nuk ka qenë konfirmuar dhe pritet që analizat shkencore që do të kryhen pas pak ditësh të hedhin dritë ose të konfirmojnë hipotezat e hetuesve.
Për vrasjen e Mattarella-s, që fillimisht u mendua se ishte bërë nga një grup neofashist, janë dënuar si urdhërues bosët më të lartë të kupolës mafioze të Sicilisë, mes të cilëve Totò Riina dhe Bernardo Provenzano. m.p.
