Kosova është në krizë institucionale dhe politike dhe kjo është një e vërtetë që duhet pranuar.
Ky është qëndrimi i Kryetarit të Lidhjes Demokratike të Kosovës (LDK), Lumir Abdixhiku, teksa në një konferencë për media ka mbrojtur idenë se në Kosovë duhet të formohet qeveri tranzitore pasi, siç thotë ai, as partia që ka qenë në pushtet e as partitë e ish-opozitës nuk e kanë shumicën.
Abdixhiku ka shpalosur 15 pikat për “Qeverinë e Unitetit Kombëtar”, duke thënë se plani argumentohet me tri të vërteta bazike.
“E vërteta e parë është se duhet ta pranojmë se jemi në krizë politike. Jemi në krizë politike ta pranojmë, krizë institucionale dhe krizë legjitimiteti.
E vërteta e dyte: Nuk kemi shumicë – asnjëra palë, asnjë grupim politik sipas preferencave politike nuk ka numra për të bërë shumicën. Kam dëgjuar kryetarë të partive të tjera duke thënë se disi partitë e ish-opozitës kanë shumicë, nuk është e vërtetë. Asnjëra palë nuk ka shumicë. Votat e deputetëve joserbë gjithashtu janë të qartë me deklarimet e tyre politike. Dhe si të vërtetë të tretë, vendi është në urgjencë prandaj edhe i duhet qeveri e unitetit”, ka thënë kreu i LDK Lumir Abdixhiku.
Ne agjendën 15 pikeshe te LDK propozohet:
- Funksionalizimi i institucioneve kushtetuese
- Qeveria e unitetit do të merret me ndërtimin e institucioneve (Pjesë do të jetë edhe riformatimi i plotë i bordeve të ndërmarrjeve publike)
- Dakordimi i plotë për rritjen e pagave dhe zbatimin e ligjit
- Pakoja emergjente për menaxhimin e krizës energjetike
- Nisja e projektit kombëtar për gazifikimin e Kosovës
- Rindërtimi i raportit me BE-në dhe SHBA-në
- Dialogu me Serbinë
- Fillimi i projekteve me rëndësi jetike për Kosovën.
- Reforme Kushtetuese
- Hartimi i strategjisë kombëtare për reformë të thellë në arsim.
- Përgatitja për lojërat mesdhetare
- Reforma strategjike e sigurisë dhe mbrojtjes.
- Rishikimi i formulës për buxhetin e komunave.
- Përgatitja për zgjedhje brenda 10 muajve.
- Mekanizmi i transparencës për periudhën kalimtare.
Sipas Abdixhikut kjo qeveri do të zgjasë deri në zgjedhjen e presidentit, pasi mandati i Osmanit përfundon në fillim të vitit 2026.
Përtej këtij propozimi, asnjë nga subjektet kryesore politike në vend nuk është deklaruar seriozisht për një bashkëpunim të tillë./kb
