Izraeli paralajmëron sulm në Teheran

Izraeli ka lëshuar të hënën paralajmërimin e parë publik për evakuimin e civilëve në kryeqytetin iranian, duke i kërkuar banorëve të largohen menjëherë nga një zonë në verilindje të Teheranit, përpara një sulmi të mundshëm ndaj infrastrukturës ushtarake në atë zonë. Paralajmërimi është bërë publik përmes një postimi në rrjetet sociale, ndërkohë që përplasjet ushtarake mes Izraelit dhe Iranit kanë hyrë në ditën e katërt radhazi. Sipas Zyrës së Kryeministrit izraelit, gjatë orëve të para të mëngjesit të së hënës, Irani ka lëshuar një breshëri raketash ndaj territorit izraelit, duke shkaktuar të paktën 8 viktima dhe plagosjen e dhjetëra të tjerëve. Si kundërpërgjigje, Forcat e Mbrojtjes së Izraelit (IDF) kanë ndërmarrë një seri goditjesh ndaj objektivave ushtarake në qendër të Iranit, përfshirë edhe qendra komanduese të Forcës Quds – një degë elitare e Gardës Revolucionare iraniane që mbështet grupet aleate të Iranit në Lindjen e Mesme. Ndërkohë, zëdhënësi i Ministrisë së Shëndetësisë në Iran, Hossein Kermanpour, deklaroi se numri i viktimave nga sulmet izraelite ka arritur në të paktën 224 persona. Nga ana tjetër, autoritetet izraelite raportojnë gjithsej 24 të vdekur në territorin e tyre, përfshirë viktimat nga sulmet iraniane. Tensionet mes dy vendeve kanë kaluar tashmë kufijtë e përplasjes përmes ndërmjetësve apo grupeve aleate dhe po marrin trajtën e një konflikti të drejtpërdrejtë ndërmjet dy fuqive ushtarake rajonale, duke rritur ndjeshëm rrezikun për një përshkallëzim më të gjerë në Lindjen e Mesme.