Milani i Massimiliano Allegrit nuk ka filluar të marrë formë, pasi për momentin te kuqezinjtë po vlerësojnë emrat të cilët do të mbeten pjesë të klubit dhe të planeve të teknikut të ri të kuqezinjve. Kështu, përveç emrave që janë në shitje, po diskutohen edhe ata të cilët janë marrë në huazim apo të cilët janë dhënë në këtë formë në klube të tjera.
Sipas “Corriere Dello Sport”, Milani ka vendosur që të mbyllë përfundimisht aventurën në radhët e kësaj skuadre të Joao Felix dhe Tammy Abraham. Të dy ishin dhënë në huazim te kuqezinjtë të cilët mund të ushtronin të drejtën e blerjes përfundimtare të kartonit. Por në të dy rastet është vendosur për “jo” e kësisoj, Felix do të kthehet të Chelsea, ndërsa Abraham do të kthehet përsëri te Roma.
Ndërkaq, Tomasso Pobega mund të vazhdojë të qëndrojë përsëri te Bologna, ndërsa Bennacer dhe Ocacor janë ende për t’u vlerësuar se ku do të vazhdojnë karrierën pasi të kthehen nga huazimet përkatëse. Për të gjithë këto lojtarë, vlen i njëjti diskutim, që janë jashtë planeve të klubit për momentin dhe Milani po synon t’i shesë që të përfitojë të ardhura për përforcime të tjera./ D.C
