Naomi Brookarsh kishte udhëtuar drejt Tel Aviv për të takuar vëllanë, kur ndërtesa ku ai jetonte, u godit nga një raketë iraniane të hënën në mëngjes.
“Ishte vërtet, vërtet e frikshme, por falë Zotit mbijetuam. Ishim në strehën kundër bombave, gjë që na shpëtoi jetën“, tregon shtetësja britanike për BBC-në.
Naomi tregon për zhurmën e fuqishme që i zgjoi nga gjumi në orët e para të mëngjesit, kur përjetuan momente tmerri.
“Papritmas pati një shpërthim masiv, zhurma më e madhe që kam dëgjuar ndonjëherë, dhe ishte sikur e gjithë dhoma po dridhej, ndienim trupat tanë duke u dridhur”, rrëfeu e reja.
Vetëm pasi dolën nga streha, ata panë dëmet. Çatia ishte shembur dhe dritaret ishin thyer. Ndërsa po largoheshin nga ndërtesa, ata panë zjarr, tym dhe ambulanca.
“Ishte si një skenë filmi, ishte si një apokalips”, tha ajo./e.t
