Nga Colin P. Clarke*
Pas më shumë se një jave bombardimesh izraelite ndaj Iranit, Shtetet e Bashkuara u përfshinë gjithashtu në konflikt, duke goditur objektet bërthamore iraniane. Tani, SHBA-të përgatiten për përgjigjen iraniane, e cila duket se është e afërt. Duke folur në televizionin shtetëror iranian pas sulmit amerikan, një spiker deklaroi: “Z. Trump, ju e nisët, dhe ne do ta përfundojmë.”
Si mund të duket kjo përgjigje iraniane?
Ndër opsionet më të mundshme janë operacionet asimetrike, si sulme ndaj trupave amerikane në rajon ose sulme terroriste nga përfaqësues iranianë në Perëndim, përfshirë edhe brenda Shteteve të Bashkuara.
Ministri i Jashtëm i Iranit, Abbas Araghchi, sugjeroi se me këtë sulm, SHBA-të kishin kaluar një “vijë të kuqe shumë të madhe.” Në këtë fazë të konfliktit, nëse Udhëheqësi Suprem i Iranit, Ajatollah Ali Khamenei, nuk hakmerret, ai mund të humbasë përkrahjen nga linja e ashpër e regjimit. Një kundërpërgjigje iraniane është një mundësi shumë reale, edhe pse koha mbetet e pasigurt.
Objektivi i parë dhe më i qartë do të ishin bazat ushtarake amerikane në Lindjen e Mesme, ku janë të vendosur dhjetëra mijëra trupa. SHBA mban baza ushtarake ose pika të avancuara në Bahrein, Irak, Jordani, Katar, Siri dhe Emiratet e Bashkuara Arabe. Ambasadat, komplekset diplomatike dhe interesat e tjera amerikane janë gjithashtu objektiva të mundshëm. Disa prej këtyre vendeve mund të goditen nga raketat iraniane, ndërsa në raste të tjera, përfaqësuesit iranianë mund të marrin nismën – qoftë rebelët Houthi në Jemen apo milicitë shiite në Irak. Departamenti Amerikan i Shtetit ka lëshuar paralajmërime udhëtimi për qytetarët amerikanë në Izrael, ndërsa ambasadat në Irak dhe Liban kanë kërkuar largimin e të gjithë personelit jo-thelbësor amerikan.
Kërcënimi më serioz në Irak vjen nga rrjeti përreth Kata’ib Hezbollah, një grup milicie shiite i mbështetur nga Irani, i cili ka sulmuar bazat amerikane në vitet e fundit dhe mund ta bëjë sërish. Sekretari i përgjithshëm i Kata’ib Hezbollah, Abu Hussein al-Hamidawi, publikoi një deklaratë javën e kaluar ku paralajmëroi: “Nëse Amerika ndërhyn në luftë, do të veprojmë drejtpërdrejt kundër interesave dhe bazave të saj të shpërndara në rajon, pa hezitim.”
Shtetet e tjera të Gjirit Persik mund të gjenden gjithashtu në shënjestrën e Iranit, siç ndodhi në shtator 2019, kur në kulmin e tensioneve SHBA-Iran, rebelët Houthi goditën me dron dy instalime nafte në Arabinë Saudite. Anije cisternë në brigjet e Emirateve të Bashkuara u sulmuan disa muaj më parë. Sot ekziston një mundësi e qartë që Irani dhe përfaqësuesit e tij të përpiqen të krijojnë kaos në Gjirin e Omanit dhe në Ngushticën e Hormuzit, përfshirë edhe vendosjen e minave detare, siç kanë bërë edhe më parë. Sulmet ndaj cisternave dhe transportit tregtar do të përçudnonin kalimin e energjisë globale dhe do të trazonin tregjet ndërkombëtare.
*Colin Clarke është drejtor i kërkimeve në Soufan Group, një firmë konsulence në fushën e inteligjencës dhe sigurisë me bazë në Nju Jork.
Burimi: New York Times/ Përgatiti për botim: L.Veizi
