Një avion i vogël që i përkiste një klub fluturimi në qytetin Champhol, në veri-qendër të Francës, është rrëzuar këtë pasdite, duke shkaktuar vdekjen e të tre pasagjerëve në bord.
Sipas prefekturës së Eure-et-Loir, avioni Cessna 172, me një motor të vetëm ka pësuar aksidentin pak pas orës 16:00, sipas kohës lokale, në një zonë banimi duke shpëtuar për pak nga përplasja me shtëpitë aty pranë.
Të tre pasagjerët, dy burra dhe një grua, humbën jetën në vendngjarje. Piloti, i identifikuar nga prokurori publik si një ish-gjeneral ushtrie 77-vjeçar me përvojë të gjerë fluturimi, po fluturonte me një çift në moshë të mesme.
Hetimet e para tregojnë se avioni, rreth tre minuta pas ngritjes, ka bërë një kthesë të ngushtë, që mund të ketë kontribuar në humbjen e kontrollit.
Avioni goditi një mur dhe më pas u rrëzua, duke dëmtuar një automjet të parkuar. m.p.
