Në pikën e kalimit kufitar të Qafë Botës sot vijon normalisht kalimi i njerëzve dhe automjeteve private, ndërkohë është pezulluar kalimi i automjeteve të cilat duhet të kryejnë veprime doganore.
Kjo pasi në doganën greke të Mavromatit puna po kryhet me personel të kufizuar pas arrestimit të 13 punonjësve të doganës dhe drejtuesit të kësaj dogane.
Ata akuzohen për mitmarrje dhe abuzim me detyrën. Sipas mediave greke hetimi ndaj tyre kishte disa muaj që kishte filluar dhe janë kapur edhe biseda telefonike që vërtetojnë se doganierët ishin përfshirë në aktivitete të paligjshme duke shmangur kontrollet në automjete dhe rimorkio të cilat kalonin mallra kontrabandë nëpërmjet ryshfetit./e.t
