Pasi kryeministri Edi Rama paralajmëroi ndërhyrjen e shtetit për të rregulluar çmimin e naftës, ka ardhur një reagim edhe nga Konfindustria. Në një deklaratë, administratori i Përgjithshëm Gjergj Buxhuku thotë se mirëpresin nismën e qeverisë, ndonëse është e vonuar, ndërsa kërkon sqarim se si do të zbatohet kjo praktikë.
“Deri më sot nismat politike për rregullimin e funksionimit të tregut të karburanteve kanë dështuar, duke shprehur korrupsionin e kapjes së shtetit ”state capture” nga lobi i kompanive të karburanteve. Njëkohësisht, mbetemi në pritje të sqarimeve nga ekzekutivi sesi është menduar të zbatohet në praktikë nisma në fjalë.”, thuhet në deklaratë.
Më tej, duke theksuar se çmimet e larta ta karburanteve kanë qenë një ndër shkaqet kryesore të shkatërrimit të industrive dhe bujqësisë, ai thekson se Konfindustria i ka kërkuar vazhdimisht ekzekutivit që të ndërhyjë në stabilizimin e çmimeve. Buxhuku rekomandon gjithashtu që, pavarësisht nismës në fjalë, duhet të merren masa të tjera si krijimi i Entit Rregullator të Karburanteve, ulja e ngarkesës fiskale, goditja e kontrabandës masive etj.
“Konfindustria i ka kërkuar në mënyrë të përsëritur publikisht ekzekutivit dhe personalisht KM Rama domosdoshmërinë e stabilizimit në ulje të çmimeve të karburanteve. Lufta kundër monopoleve të karburanteve, krijimi i Entit Rregullator të Karburantevr, ulja e ngarkesës fiskale, goditja e kontrabandës masive deri në shkelje të embargove të OKB ndaj shteteve si Iran, Rusi, Libi, etj, janë veprimet ligjore, që duhen marrë pavarësisht nismës në fjalë.”, shton Buxhuku.
Dy ditë më parë, kryeministri Edi Rama, nga takimi që mbajti për bujqësinë në Cërrik, deklaroi se qeveria do të ndërhyjë në çmimin e naftës. Kreu i qeverisë paralajmëroi se brenda këtij viti do të vendoset një ekuilibër i ri i çmimit të naftës për konsumatorët, me qëllim lehtësimin e barrës ekonomike.
Deklarata e plotë:
Konfindustria vlerëson, se është e mirëpritur ndonëse e vonuar, nisma e shpallur nga KM Rama për ndërhyrje shtetërore të drejtëpërdrejtë në stabilizimin e çmimeve të tregut të karburanteve.
Deri më sot nismat politike për rregullimin e funksionimit të tregut të karburanteve kanë dështuar, duke shrehur korrupsionin e kapjes së shtetit/”state capture” nga lobi i kompanive të karburanteve. Njëkohësisht, mbetemi në pritje të sqarimeve nga ekzekutivi sesi është menduar të zbatohet në praktikë nisma në fjalë.
Konfindustria ripërsërit vlerësimin e saj, se çmimet e larta të karburanteve, janë ndër shkaqet kryesore të shkatërrimit të industrive dhe bujqësisë shqiptare. Në 3 mujorin e parë të vitit 2025 prodhimi industrial ka rënë sërish me mbi 7% dhe bujqësia me mbi 5%. Defiçiti tregëtar në vitin 2024 arriti rekordin historik në 5,4 miliard euro. Karburantet sot në Shqipëri tregëtohen 35-40% më shtrenjtë se në Maqedoninë e Veriut, Kosovë, Maili i Zi, Bosnje Herzegovinë, etj. Tregu i karburanteve është më i madhi në Shqipëri me të paktën 2 miliard $/vit.
Konfindustria i ka kërkuar në mënyrë të përsëritur publikisht ekzekutivit dhe personalisht KM Rama domosdoshmërinë e stabilizimit në ulje të çmimeve të karburanteve. Lufta kundër monopoleve të karburanteve, krijimi i Entit Rregullator të Karburantevr, ulja e ngarkesës fiskale, goditja e kontrabandës masive deri në shkelje të embargove të OKB ndaj shteteve si Iran, Rusi, Libi, etj, janë veprimet ligjore, që duhen marrë pavarësisht nismës në fjalë.
Gjergj Buxhuku
Administrator i Përgjithshëm
