Telefoni që iu gjet Laert Haxhiut në qeli u “hëngri kokën” zyrtarëve të lartë të burgut të Drenovës. Një ditë më parë, Drejtoria e Përgjithshme e Burgjeve vendosi të shkarkonte nga detyra drejtorin e burgut të Drenovës, Fatjon Fashon dhe shefin e Policisë së këtij burgu, Sokol Kacolin.
Pas këtij vendimi, burime për gazetaren e Top Channel, Anila Hoxhën konfirmojnë se ministri i Drejtësisë, Ulsi Manja ka vendosur për emrat e rinj të cilët do të vendosen në këto poste.
Mësohet se drejtor i burgut të Drenovës do të jetë Lorent Nako, ndërkohë që shefi i Policisë në këtë burg është emëruar Artan Kocibelli.
Kujtojmë se disa ditë më parë gardianët i gjetën telefon në qeli Laert Haxhiut. Burime për mediat konfirmuan më pas se telefoni i cili iu gjet Haxhiut u soll në kryeqytet pranë laboratorit të SPAK.
Ky telefon i të “fortit të Lushnjës” u hëngri dhe “kokën” dy zyrtarëve të burgut të Drenovës, drejtorit Fatjon Fashon dhe shefit të Policisë së këtij burgu, Sokol Kacolin.
Laert Haxhiu u ekstradua më 3 Korrik të vitit të kaluar nga Greqia një vit pasi ishte arrestuar në shtetin fqinj për ngjarje kriminale.
Haxhiu, kundërshtar i ish-kreut të bandës së Lushnjës Aldo Bare, u dënua përjetë për masakrën e Lushnjës në vitin 2017, ku mbetën të vrarë Zamir Latifi, mik i Bares, dhe Jurgen Hoxha.
Ata u qëlluan me automatik në një lokal në qendër të Lushnjes, ndërsa pronari i lokalit dhe një kalimtar mbetën të plagosur aksidentalisht.
Me burgim të përjetshëm për masakrën e Lushnjës janë dënuar më herët bashkëpunëtorët e Haxhiut, Anterio Kaloshi dhe Orgest Bilbili.
Laert Haxhiu u fundos përfundimisht pas dëshmisë së të penduarit Artan Tafani, i cili rrëfeu përfshirjen e të dyve, por edhe një grupi të madh personash në 16 ngjarje kriminale, mes të cilave 4 vrasje në Shqipëri dhe 2 të tjera në Greqi. m.p.
