Prostitucioni vijon të mbetet një aktivitet mjaft i përhapur dhe me të ardhura të larta në Shqipëri, pavarësisht ndërhyrjeve sporadike të policisë. Ky fenomen jo vetëm që nuk është zhdukur, por duket se po zgjerohet gjithnjë e më shumë.
Me afrimin e sezonit turistik, veçanërisht gjatë verës, kur rritet ndjeshëm numri i vizitorëve, shtohet edhe numri i vajzave që ofrojnë shërbime seksuale. Eksperti i sigurisë Fatjon Softa tha se vetëm në Tiranë mendohet të jenë rreth 1 300 deri në 1 500 vajza që ushtrojnë këtë aktivitet. Sipas tij, qytetet bregdetare si Durrësi dhe Ksamili shfaqin një rritje të dukshme të këtij fenomeni, për shkak të fluksit të madh të turistëve që frekuentojnë këto zona gjatë sezonit veror.
Ai tha gjithashtu se çmimet për një orë shërbimi në kryeqytet variojnë nga 100 deri në 200 euro, ndërsa fitimet ditore për një vajzë mund të arrijnë deri në 2,500 euro. Vajzat që ushtrojnë këtë aktivitet janë kryesisht shqiptare, por ka edhe të huaja nga Kina, vende të ndryshme të Evropës dhe Amerika Latine. Këto të fundit shpeshherë lidhen me rrjete të organizuara, ku bashkëpunojnë me shtetas shqiptarë që kanë përvojë në këtë fushë. Për të ushtruar aktivitetin, sigurojnë ambiente me qira, zakonisht përmes platformave si Airbnb.
“Shkojnë nga 100-200 ora, deri në 2 500 euro dita. Ka një prezencë më të shtuar kryesisht Tirana, mendohet rreth 1 300-1 500 vajza, dhe pjesa tjetër pastaj fillon Durrësi me 200-250 dhe qytetet e tjera deri në Ksamil.
U bënë disa vite që kryesisht gjatë sezonit kemi një fluks të shtuar të vajzave që prostituojnë në vendin tonë nëpërmjet disa agjencive të eskortave. Fillimisht filluan nëpërmjet faqeve online. Grupet shqiptare por jo vetëm, grupe kineze, grupe që vijnë nga Evropa dhe Amerika Latine, kanë gjetur një bashkëpunim me shqiptarë të cilët krijojnë një organizim të tillë: Marrin shtëpi me qira, kryesisht AIRBNB”, tha eksperti për “A2 CNN”.
Megjithëse prostitucioni ndalohet me ligj në Shqipëri dhe është i sanksionuar në Kodin Penal, duket se ky sektor informal vijon të funksionojë me ritme të larta./e.t
