Pas debatit që ka patur mes Kryeministrit Edi Rama dhe kryebashkiakut të Konispolit, Erges Dule, për shkarkimet e drejtorëve e administratorëve, ka ardhur reagimi i këtij të fundit.
Erges Dule, në një reagim në Facebook, ka sqaruar edhe diskutimin sa i përket largimit të drejtorëve.
Sipas kryebashkiakut të Konispolit, kjo është një nismë pozitive, por Erges Dule ka theksuar se nuk do të shkarkojë nga detyra asnjë punonjës që ka bërë punë të mirë.
Në një takim me Kryeministrin disa ditë më parë, kryebashkiaku i Konispolit refuzoi urdhrin e Ramës duke thënë se janë të aftë. Ndërsa Rama iu përgjigj duke i thënë që ta jepte ai dorëheqjen.
Reagimi i plotë i Erges Dules:
Përshëndetje të gjithëve! Ju falenderoj për interesimin dhe komentet por ju garantoj që nuk ka asnjë debat në lidhje me shkarkimin e administratorëve.
Kjo është një nismë për ripërtëritjen e administratës, për një rritje në cilësinë dhe sasinë e shërbimeve ndaj qytetarëve. Kush e ndien veten që mund të bëjë më tepër është i ftuar të aplikojë për këto pozicione pranë sekretarisë se bashkisë Konispol. Me këtë administratë kemi bërë plot punë të mira për komunitetin, pastrim teritori, kanale kullues e vaditës, kemi shuar zjarre, kemi bërë ndriçim publik ne 100% të teritorit, kemi shtruar rrugë rurale, infrastrukturë bujqësore, kemi bërë projekte, kemi pritur e trajtuar qindra kërkesa/ankesa, kemi asistuar në aplikime të ndryshme e-albania, kemi organizuar aktivitete kulturore, mirmbajtje rrugë rurale, mirmbajtie e investime në shkolla etj etj. Ka akoma për të bërë? Patjetër që po. A janë të gjithë punonjësit njësoj të përkushtuar? Po ju them unë që jo. Por punonjësit varen dhe angazhohen nga ai që i drejton. Nëse drejtuesi nuk ka pasionin, dëshirën dhe dashurinë për vendin e vet atëherë dhe punonjësi do bëje aq sa për t’u dukur. Në Konispol ju siguroj se gjenden të gjitha këto dhe çdo ditë bëhet punë. A mjaftojnë këto? Sigurisht që jo. Këtu na duhet ndihma juaj dhe opinioni juaj. Nëse administrata punon mirë dhe është në shërbim të qytetarit s’ka vend për frikë dhe nuk lëviz asnjë. Opinioni juaj vlen dhe është vlerësimi i performancës për ne. Mos nguroni të shprehni mendimin tuaj per secilin nga punonjësit e bashkisë Konispol, na shkruani për cdo problematikë. Shpresoj që kjo nisëm të vazhdojë në çdo zyrë shteti ku i shërbehet qytetarëve!/e.t
