Në gjysmën e parë të këtij viti, në arkën e shtetit u futën gati 366 miliardë lekë. Të dhënat nga Ministria e Financave tregojnë se, në krahasim me janar-qershorin e vitit të kaluar, të ardhurat në buxhetin e shtetit janë zgjeruar me 22.8 miliardë lekë, ose 6.7 për qind.
“Ky është niveli më i lartë i shënuar ndonjëherë dhe unë mendoj se arsyeja kryesore në këtë ecuri është strategjia për menaxhimin e të ardhurave dhe shpenzimeve”, thotë për A2 CNN Eriola Hoxha, pedagoge, eksperte për ekonominë.
Peshën më të madhe në rritjen e të ardhurave gjatë gjashtëmujorit të parë e ka mbajtur tatimi mbi pagat. Rritja e pagës për punonjësit e administratës publike, por edhe aksioni i tatimeve kundër nëndeklarimit të pagave, kanë bërë që arka e shtetit të përfitojë gati 41 miliardë lekë.
Pozitivisht ka ndikuar edhe shtimi i konsumit, i nxitur edhe nga turizmi. Nga janari deri në qershor janë mbledhur 33.2 miliardë lekë nga TVSH-ja, rreth 20.8% më shumë se vitin e kaluar.
“Kjo rritje e TVSH-së tregon qartë se konsumatorët janë aktivizuar më shumë, dhe turizmi luan një rol të rëndësishëm në këtë përmirësim”, thotë Hoxha.
Ndërkohë, shpenzimet në fund të qershorit arritën në 332.5 miliardë lekë. Edhe pse në rritje me 41.2 miliardë lekë në raport me gjashtëmujorin e parë të vitit 2024, përsëri mbeten më të ulëta sesa të ardhurat.
Ndikim në ecurinë e dobët të shpenzimeve, kryesisht atyre kapitale që lidhen me investimet, patën zgjedhjet e 11 majit, të cilat kufizojnë shpenzimet, pasi konsiderohen në shkelje me Kodin Zgjedhor.
“Ndërsa të ardhurat po rriten, shpenzimet kanë qenë të kufizuara, sidomos në investimet kapitale, për shkak të periudhës zgjedhore, që ndikoi në ritmin e zbatimit të projekteve”, thotë Hoxha.
Të ardhurat dukshëm më të larta se shpenzimet bënë që ekonomia e vendit të mbyllej pozitivisht në gjashtë muajt e parë të vitit, me mbi 33 miliardë lekë të kursyera.
